Shillong, Rymphang 05
Ka kynhun myntri jong ka Jylla ha ka sngi Palei ka la mynjur ban pyntreikam ïa ka Sports Policy bad ïa ka jingpynkhreh na ka bynta ban thung kam ïa ki nongïalehkai kiba wanrah nam bad burom ïa ka Jylla.
Kane ka jingpyntreikam ka thmu ban pynïoh jingmyntoi ïa ki nongïalehkai da kaba thaw ïa ki lad kiba kyrpang na ka bynta kito kiba lah ban wanrah burom ïa ka Jylla.
“Ngi la shim ïa kane ka rai kumba 6-7 bnai mynshwa bad ngi sngew dei ban wanrah katto katne ki jingpynkylla ki ban ai jingmyntoi ïa ki nongïalehkai,” la pynpaw u Myntri Rangbah ka Jylla u Conrad K Sangma.
Ki kyndon thymmai kin ailad ïa ki nongïalehkai kiba khur takma ha ki lympung ïalehkai kiba la ïoh jingithuh, kum ki Olympic bad ki lympung ïalehkai hapoh ka ri, ba kin shah pynrung kam sorkar.
Yn thaw ïa ka cadre kaba kyrpang na ka bynta ki briew ki nongïalehkai kiba kynsai, ban pynthikna ba kan ym don ka jingthut ha ki jingkyntiew kyrdan bad kiwei kiwei ki jingmyntoi na ka bynta kiwei pat ki nongtrei jong ka tnad.
“Yn thaw ïa ka kyrdan kaba kyrpang, ka cadre kan plie lad na ka bynta u nongïalehkai kiba paw ha kaba kane kan sangeh noh tad haduh ba u ne ka briew ki la shongthait,” la bynrap u Sangma.
Shuh shuh ka sorkar ka la pynshai ruh ïa ka rukom pynskhem ïa ki nongïalehkai hapoh ka kyrdan 2% reservation bad ka aplikeshon lyngba ka online sha ka tnad ïalehkai. Kane kan pynlah ïa ki nongïalehkai kiba dei hok ban apply ïa ki jingmyntoi ba la buh kyrpang.
