Shillong, Rymphang 05
Ka Shillong Lajong FC, Nongthymmai Nongkynrih, Mawkhar SC bad ka Langsning ki la jam sha ka phainal ha ka kyrdan ïalehkai U-12 bad U-14 Football League 2026 ba la pynïaid da ka Shillong Sports Association (SSA) bad kin pynkhreh ban ïaknieh nam lahduh ha ka sngi Saitjaiñ.
Ha ka jingïakhun jong ka kyrdan ïalehkai U-12 kaba la long ha ka sngi Palei ha SSA Stadium Polo, ka Shillong Lajong ka la pynliem noh ïa ka Umphyrnai SC lyngba ka tie-breaker da 4-2 kol hadien ba kine ki kynhun ki la ïakhaid mar 1-1 kol.
Ha kawei pat ka jingïakhun kaba ar, ka Nongthymmai Nongkynrih ka la pynliem noh ïa ka Pay For Right Football Academy da 3-0 kol.
Tang mar ïasdang ka Nongthymmai ka la ïoh ban pynkhih jar lyngba u D.Lyngdoh ha ka minit kaba 8. Tang hadien shi minit kane ka kynhun ka la thep biang lyngba u R.Kharshandi, uba la pynbud biang sa shi kol ka minit kaba 36.
Haba phai sha ka jingïakhun ka semi final jong ka U-14, ka Mawkhar SC ka la pynliem noh ïa ka Umphyrnai SC da 4-2 kol.
Ïa ki kol ka Mawkhar la thep da u S.Syiemïong ha ka minit kaba 6, kumjuh u V.Mawsor- (48), N.Nonglait (67) bad kawei pat la ïarap pynthep da ka Umphyrnai ha ka minit kaba 29. Na ka liang ka Umphyrnai ka la pynphai kylla ar kol lyngba u B.Kharkongor (11) bad u A.Nongdhar (20).
Ha kawei pat ka jingïakhun, ka Langsning FC ka la pynliem noh ïa ka Nongthymmai Nongkynrih da 2-1 kol.
Kane ka nam jop ka la wan lyngba ki ar kol ba la thep da u N.Mukhim ha ka minit kaba 17 & 36, katba na ka Nongthymmai Nongkynrih la thep da u B.Dkhar (67).
Lyngba kine ki jingjop, ka Shillong Lajong FC kan ïakhun pyrshah ïa ka Nongthymmai Nongkynrih ha ka por 1 baje mynsngi ha ka U-12, katba ha ka U-14 ka Mawkhar SC ïa ka Langsning ha ka por 2:30 nohphai sngi.
