Shillong, Rymphang 05
Ka Kerala ka la pynliem noh ïa ka Punjab bad ka Services ka la jop ïa ka Railways, ha ka jingïakhun semi final jong ka 79th National Football Champion-ship na ka bynta ka Santosh Trophy 2025-26 (Final Round) ha ka sngi Palei ha Dhakuakhana bad ha Silapathar, Assam.
Te kumta ka Services kan ïakynduh pyrshah ïa ka Kerala ha ka jingïakhun final ka ban long ha ka sngi U Blei ha ha ka por 1 baje mynsngi.
Haba phai sha katei ka jingïakhun semi final, ka Kerala ka la lah ban pynliem noh ïa ka Punjab da 4-0 kol. U Muhammed Riyas u la thep marwei ar kol ha ka minit kaba 34 & 83, katba ïa kiwei pat la thep da u Muhammed Ajsal (16) bad u Viknesh M (45).
Ha kawei pat ka jingïakhun, ka Services ka la pynliem noh ïa ka Railways da 2-0 kol. Kane ka nam jop ka la wan urlong lyngba ki kol ba la thep da u Abhishek Pawar ha ka minit kaba 33 bad kawei pat lyngba ka penalty ha ka minit ba 73.
