Shillong, Rymphang 06
Ka lympung ïalehkai Super Division Cricket League 2026 ba la pynïaid da ka Shillong Cricket Association (SCA) ka la bteng biang ha ka sngi Thohdieng ha kaba ka Sputnik Spartan CC ka la khur ïa ka jingjop hadien ba ka la pynliem noh ïa ka Young Guns da 3 wiket.
Ha kane ka jingïakhun kaba la long ha madan ïalehkai kriket jong ka MCA ha Polo, ka Young Guns ka la kam trai ban tied nyngkong ha kaba ka la kamai 135 run bad shah pynkhyllem baroh ki nongtied ha ki 32 over. U Mannan Surana u la tied 29 run na ki 66 bol bad u Aditya Singh u la ïoh 17 run na ki 21 bol. Katba u Supriyo Chanda bad u Jitumoni Kalita ki la khur mar 4 wiket na ka bynta ka Suptnik Spartan.
Haba wan shimti ïa ka pali kaba ar, ka Suptnik Spartan ka la kynjoh sha ka thong da kaba kamai 138 run bad shah pynhap 7 wiket ha ki 32 over. U Jitumoni Kalita u la tied 31 run na ki 19 bol bad u Uttam Chanda u la ïoh 21 run na ki 56 bol. Katba u Rudra Singh Rathore u la khur 4 wiket bad u Grish Raj Ray u la ïoh 2 wiket na ka bynta ka Young Guns. Ïa ka nam Player of the Match la khur da u Suprio Chanda, uba la tied 11 run bad ïoh 4 wiket.
