Shillong, Rymphang 06
U President ka All Meghalaya Kick-boxing Association (AMKA) u Bah Samuel Hashah u la pynpaw ka jingïaroh ïa ka jingshim khia ka Sorkar na ka bynta ka bhah kam bhah jam ïa ki nongïalehkai kiba wanrah nam bad burom ïa ka Jylla bad u la kyntu ba kan pyntreikam ïa ka ym tang ban shu pynpaw tang ha ki kot ki sla.
Kane ka la wan hadien ka jingïalang jong ka kynhun myntri kaba la mynjur ïa ka jingpyntreikam ïa ka Sports Policy ryngkat ki kyndon ba la pynkhreh na ka bynta ban thung kam Sorkar ïa ki nongïalehkai kiba wanrah nam ïa ka Jylla kaba long 2% kaba la buh kyrpang na ka bynta jong ki nongïoh takma ha ki lympung ïalehkai kiba heh kum ka Olympic, National Games, bad ka South Asian Games.
Haba ïakren bad u nongthoh khubor ha ka sngi Thohdieng, u Bah Hashah u la ong ba kane ka jingshim rai ka Sorkar ka long kaba biang eh na ka bynta ki nongïalehkai. “Nga sngewkmen eh haba nga ïohsngew ïa katei ka rai jong ka Sorkar Jylla hapoh ka jingïalam u Conrad Sangma kum u Myntri Rangbah halor ka jingmynjur ïa ka Sports Policy ryngkat ki bhah kiba kyrpang na ka bynta ki nongïalehkai. Nga sngew ba kane kan ai mynsiem ïa ki khynnah samla kynthei bad shynrang ba kin long kiba minot bad trei shitrhem ha kino kino ki jingïalehkai. Kane ka long kum ka jingpynshlur ruh ïa ki ba kin ïashim bynta ha kino kino ki jingïalehkai.”
“Kum kine ki rai kim dei ban shu kut tang ha ki kot ki sla khlem da pyntreikam ïa ki, hynrei nga kyntu ïa ka Sorkar ba kan shim khia bad ban pyntreikam ïa ki khnang ba ki khynnah samla jong ngi kin ym sepei.”
“Kumba ka paw ki don bun ki khynnah samla kiba la wanran nam bad burom ïa ka Jylla ha ki lympung ïalehkai Shabar ri bad ruh ha kylleng jong ka ri. Hooid lehse mynta ki dangap ïa kata ka kam haduh mynta, hynrei ha kiwei pat ki jylla ka jingbhah kam ïa ki nongïalehkai kiba wanrah nam ka long kaba kloi bha,” ula bynrap.
“Nga kyntu ïa ka Sorkar Jylla ba ka dei ban ai ïa ka kam ha kano kano ka kyrdan ba ki dei hok ban ïoh khnang ba ki lah ban pynjanai shuh shuh ha ki kam ïalehkai jong ki bad ha kajuh ka por ruh ba kin lait na kino kino ki jingsniew bad ba kan long ka lawei na ka bynta jong ki.”
