Shillong, Rymphang 08
Ka FC Bengaluru United ka la bteng ïa ka kontrak jong u Allen Camper Lyngdoh Nongbri na ka bynta ka aïom ïalehkai 2026-27.
U Allen uba la ïalehkai na ka bynta ka Bengaluru Utd ha ki 13 sien na ki 16 tylli ki jingïalehkai jong ka lympung ïalehkai I-League 2 ha ka samoi ïalehkai 2024-25, ha kaba u la thep shi kol bad ïarap pynbuh shisien.
U la shah jied ruh ban mihkhmat ïa ka Meghalaya ha ka Santosh Trophy 2025-26, hynrei u la ïoh ban ïalehkai tang ha ka jingïakhun jong ka wat nyngkong ha u bnai Nohprah pyrshah ïa ka Sikkim. Hadien um shym la ïoh ban ïalehkai pyrshah ïa ka Arunachal Pradesh bad hadien kata um shym la shah kynthup satia hapoh ka kynhun kaba la leit ha ka taïew ba la lah sha Assam na ka bynta ka wat kaba khatduh.
