Jowai, Rymphang 08
U Myntri ka tnad ïalehkai ka Sorkar Jylla bad uba long u MLA ka Jowai u Bah Wailadmiki Shylla ryngkat ki ophisar ka tnat pynroi sor, ha ka 3 tarik mynta u bnai ki la hiar jurip ïa ki katto katne tylli ki shnong kiba hap hapoh ka 2 Jowai Constituency na ka bynta ka jingpynkhreh ïa ka 39th National Games 2027.
Haba kren sha ki lad pathai khubor u Bah Wailadmiki ula ong ba kane ka jinghiar jong u sha ki shnong ka long hadien ka jingïalang kaba la long ha kamra u Symbud Myntri Rangbah ka Jylla uba khmih ïa ka tnad kam pynroi sor ha ka jingdonlang u Commissio -ner Secretary bad ki ophisar ha kaba la ïatai sani halor ka jingpynkhreh ïa ka National Games
U la ong kiba bun ki jingïaleh -kai yn pynlong ha Shillong bad Tura, hynrei hadien ka jinglah ban pynïaid beit ïa ka Meghalaya Games ha nongbah Jowai, na ka liang ka Sorkar ruh ka la ailad ïa ka Jowai ba kan don 3 tylli ki jingïalehkai.
Lyngba kane ula ong ba ula kyrpad ïa ka tnad pynroi sor ba kan pyrkhat kyrpang na ka bynta ban pynwan dur ïa ka sor Jowai namar ka National Games ka dei kawei na ka lympung ba kyrpang bha ha ka histori jong ka Meghalaya.
Hadien ka jingïakren hapoh ka jingïalang, u Bah Shylla ula ong ba na ka liang ka tnat ruh ka la ailad ïa ki ban pynkhreh noh ïa ka jingmang pisa katkum ka jingdonkam bad na ka liang jong u ruh ryngkat ki ophisar ka tnat ki la hiar sha ki hiar jurip sha ki katto katne shnong.
Shuh shuh u Bah Wailadmiki ula ong, ba u kwah ba ki Dorbar Shnong kin tyrwa ïa ka jingkwah jong ki bad ban pynkloi namar ka National Games kan long ha u snem 2027 bad donkam ban pynkhreh ïa ka jingmang pisa hapoh u Lber mynta u snem.
