Jowai, Rymphang 08
U Mayalang Pakem uba dei u khun jong u Ma Plan Lyngdoh bad ka Kong Stillda Pakem ba shong ba sah ha ka shnong Mynthong Jowai u la ïoh ban khur haduh laitylli ki takma Ksiar ha ka lympung ïakop pyni dohksah ba la pynlong ha Guwahati, Assam.
Ha ka jingïakop ba la tip kum ka Mr. & Ms East India (Zonal Body Building & Model Championship) kaba la long ha Rukmini Nagar Auditorium, Guwahati, Assam ha ka 31 tarik Kyllalyngkot u Mayalang u la jop ha ka kyrdan kaba nyngkong.
Nalor kane u la jop biang ïa ka takma Ksiar ha ka jingïakop ba la tip kum ka Mr. & Ms India Natural 2025-2026, bad kumjuh ïa ka nam ‘MENS PHYSIQUE’ ha ka kyrdan kaba nyngkong ba la pynlong ha ka 31 tarik Kyllalyngkot bad 1 tarik Rymphang ha katei ka juh ka jaka.
