Nongpoh, Rymphang 08
Ka lympung ïalehkai Open to All Knockout Football Tournament 2025-26 ba la pynlong da ka seng ki nongñiah thuk-thuk ne ka The Ultimate Legend Bikers Association (TULBA), Eastern Zone ka la poi sha kaba kut ha ka sngi Saitjaiñ ha kaba ka One United FC ka la khur ïa ka nam lahduh hadien ba ka la lah ban pynliem noh ïa ka Kyllumlang FC da 2-1 kol ha Madan Shnong Umroi, Umeit.
Ka jingthmu jong ka TULBA haba ka pynlong ïa kane ka lympung ka long shi bynta ban pynmih pisa na ka bynta ban kyrshan ïa ki long ïing kiba duk bad kiba jynjar bad khamtam eh ban kot sha ka thong halor ka jingthmu na ka bynta ban pynshna ïing ïa kawei ka longïing kaba duh ba rangli hapoh ka dong Ribhoi District.
Te kumta ka One United kaba long ka lahduh ka la ïohpdiang ïa ka khusnam pisa kaba T. 1 lak, katba ka Kyllumlang ka la ïoh T. 50 hajar ryngkat bad ki trophy. Ïa ka kyrdan balai ne third place la ïoh da ka Western NCB, kaba la lah ban pynliem noh ïa ka Umktieh FC lyngba ka tie-breaker bad ka la ïoh ban khur ïa ka khusnam pisa kaba T. 10 hajar tyngka ha ryngkat bad ka trophy.
Ïa katei ka lympung la wan pynhap pyrda da u MLA ka Umroi u Bah Damanbait Lamare kum u kongsan ha ka jingdonlang lang u Bah Raymond Kharbuli, 2nd Incharge Khapmara Police Outpost, Bah P.B Sylliang, Secretary ka Synjuk ki Rangbah Shnong Ribhoi, Bah H. Marweiñ, President ka Ribhoi Mihngi Sports Association, Bah P. Malngiang, Rangbah Shnong ka Umeit lem bad u Bah Samuel Kurbah, President ka TULBA Eastern Zone bad u Bah Damiyo Lamare kum u
secretary.
