Shillong, Rymphang 08
Ka jingïa ap khmih lynti u Cristiano Ronaldo na ka bynta ban rah ïa ka nam lahduh ba nyngkong ha ka Saudi Pro League ka lah ban don ha ka jingeh kaba khraw hadien ba u Karim Benzema u rangïalehkai ba paw jong ka France u la mih noh na ka Al-Ittihad na ka bynta ban leit ïasoh noh sha ka Al-Hilal ha ka lah sngi U Blei bad kane ka jingleit ïasoh ka long kum ka jingïatynjuh bor bad ka Al-Nassr.
Une u rangïalehkai uba la ïohpdiang teng ïa ka khusnam Ballon d’Or u ïasoh bad ka Al-Hilal kaba long ka kynhun kaba dang lamkhmat ha kaba ka dangtam da 1 poiñ ïa ka Al-Nassr jong u Ronaldo. Ka jingwan jong u Benzema ka long ka jingïarap ban nangpynkhlaiñ ïa ka kynhun bad ban ïaknieh ban bat ïa ka kyrdan ba hakhlieh ha katei ka lympung ïalehkai phutbol Saudi.
U Ronaldo, uba la leit sha Saudi Arabia ha kaba kut jong u snem 2022, u dangïai khmih lynti ban rah ïa ka nam lahduh ha ka sien kaba nyngkong jong u ha katei ka lympung. U paralok barim ba la ïalehkai lang ha Real Madrid, u Benzema, u la ïoh ban lehkmen naduh ba u la wanïasoh ha u snem ba la lah, ha kaba u la ïalam ïa ka Al-Ittihad sha ka nam lahduh jong ka league bad ka King’s Cup hashwa ba un leit sha Riyadh.
Ka Al-Hilal ka dei ka klob kaba paw ha Saudi Arabia, kaba la ïoh ban khur ïa ki 21 tylli ki nam lahduh ha ka league bad saw tylli ki nam lahduh ha ka Asian Champions League. Ki la lah ban pynpaw ïa ka jingjop kaba phylla da kaba pynliem ïa ka Manchester City da 4-3 kol ha ka Club World Cup.
Mynta u coach u Simone Inzaghi, uba la jop ar sien ha ka final jong ka Champions League, ka Al-Hilal ka la don hapdeng ka jingeh ban pynurlong ïa ka jingangnud jong u Ronaldo ban rah ïa ka nam lahduh. Ka jingsoi jong u Benzema ka la wan hapdeng ki jingsngewdiaw u Ronaldo namar ka jingbym lah ka Al-Nassr ban pynkynriah ïa ki nongïalehkai.
Baroh lai tylli ki klob – ka Al-Hilal, Al-Ittihad bad ka Al-Nassr ki dei kiba bun ki trai jong ka Saudi Arabia, ha kaba ka Al-Hilal ka dei kaba paw. Ka la soi ïa u Neymar na ka Paris Saint-Germain ha u snem 2023 bad mynshwa ka la pyrshang ban ïasoi ïa u Kylian Mbappe bad u Bruno Fernandes ban buh ïa ka rekod pyrthei.
Haduh mynta u Ronaldo, uba la jop san sien ïa ka Ballon d’Or bad uba dei ruh u rangïalehkai ba hakhmat ha Saudi Arabia, u la lah ban pynurlong ïa ka nam lahduh tang ha ka Arab Champions Cup.
