Shillong, Rymphang 09
Ka Kong Senebi Syngkli, ka ‘thei ïakhun kti ka Jylla na Ri-Bhoi District ka la lamkhmat kum ka kapten ïa ka kynhun ki nongïalehkai ïakhun kti jong ka India ha ka World Arm Wrestling & Para Arm Wrestling Cup 2026 kaba la long ha Tashkent, Uzbekistan naduh ka 31 tarik u Kyllalyngkot haduh 7 tarik mynta u bnai.
Kum ka kapten ka la ïoh ban khur ar tylli ki takma rnong ha ka kyrdan ïakhun jong ka 60 kg Senior Women.
Nalor ki ar tylli ki takma, ka Senibi Syngkli ka la ïoh ruh ïa ka nam “Female Player Of The Year” kaba la ithuh lyngba ka Pro Panja League (PPL) kaba dei ka lympung Arm Wrestling kaba hakhmat eh ha Ri India.
Ha ka jingwanphai sha ka ïing, na ka liang ka Women Organisation of Ri-Bhoi District lem bad ka Hynñiewtrep National Youth Front (HNYF) Northern Region lyngba ka Sports Cell ki la pdiang burom ïa ka ha Umlyngkdait ha ryngkat ki kyntien ai mynsiem bad kitbok kitwriang ïa ka.
Ha kane ka sngi la ïa donlang da ka Kong Mery June Myrsing, President ka Women Organisation of Ri-Bhoi District lem bad ki dkhot ka HNYF Northern Region kiba kynthup ïa u Samla Birbor Khongbeh, Sports Secretary, u samla Ronald Tangsang, Asst Discipline Secretary bad u Bah Donroi Kshiar, Education Secretary lem bad ki dkhot jong kitei ki ar seng.
