Shillong, Rymphang 09
Ka Umkaber SC, Maw-sawrit SC bad ka Maw-sadang SC ki la long ki lahduh ha ka First, Second bad Third Division ba la pynïaid da ka Tyrsad Area Sports Association (TASA).
Ha ka jingïakhun phainal jong ka First Division kaba la long ha ka sngi Saitjaiñ ha madan Mawlum Tyrsad, ka Umkaber ka la pynliem noh ïa ka Mawlum Tyrsad SC da 3-2 kol lyngba ka ‘extra time’.
Ka jingïakhun ha katei ka sngi ka long kaba itynnad bad kaba ïakhaid bha ha kaba baroh ki la pyrshang ban ïakhun tyngeh. Ka Umkaber ka la pynkhih jar nyngkong eh lyngba u Pynkupbor Kharbteng ha ka minit kaba 25 lyngba ka free-kick na ka bynta ban tam shi kol ha ka kylla step.
Hadien katto katne por ba la bteng ïa ka jingïa-khun jong ka kylla miet, ka Mawlum Tyrsad ka la pynïakhaid kylla lyngba u Banjiedlang Khongsit ha ka minit kaba 77. Hashwa ban wai ka Umkaber ka la ïoh ban thep biang sa shi kol lyngba u Janaising Marbaniang (85) hashwa ba ka Mawlum Tyrsad kan pynïakhaid kylla lyngba u Marceleno Khongsit ha ka minit kaba 90+1.
Dei ha ka ‘extra time’ ba ka Umkaber ka la ïoh ban thep biang sa shi kol lyngba u Pynkupbor Kharbteng (92) bad ban khur syndon ïa ka jingjop.
Ha ka jingïakhun phainal jong ka Second Division, ka Mawsawrit ka la pynliem noh ïa Nong -madan SC lyngba ka tie-breaker da 5-4 kol.
Kumba ka paw kine ki kynhun ki la pyni ïa ka jingkhlaiñ bor mar kylliang ha kaba ki la ïathep mar 2-2 kol. Ka Mawsawrit ka la pynkhihjar nyngkong lyngba u Lestarjune Umdor ha ka minit kaba 28 bad u Dame Dotni (38) na ka bynta ban tam ar kol ha ka kylla step, hynrei na ka liang ka Nongmadan ka la lah ban pynphai kylla ar kol ha ka kylla miet lyngba u Diphas Nongbet (66) bad u Jestin Mukhim (70).
Haba phai sha ka jingïakhun jong ka Third Division, ka Mawsadang SC ka la pynliem noh ïa ka Young boys SC lyngba ka tie-breaker da 5-4 kol.
Ha katei ka jingïakhun baroh ar liang mamla ki la ïathep mar 1-1 kol. Tang mar ïasdang ka jing-ïalehkai ka Mawsadang ka la pynkhih jar nyngkong lyngba u Rajestar Rani ha ka minit kaba 4, hynrei ha ka kylla miet ka young boys la pynphai kylla lyngba u Pyntiplang Khong-sit ha ka minit kaba 45.
Ïa ka nam Top Scorer la ïoh da u Jeswelborn Kharbani (Mawkynroh SC) ha ka First Division, u
Dame Dotni (Mawsa-writ SC) ha ka Second Division bad u Rikibad Rani (Mawsadang SC) ha ka Third Division. Ka nam Best Goalkeeper ka leit sha u. Pynnehlang Wahlang (Umkaber SC) ha ka First Division, Badondor Mawkhiew (Mawsawrit SC) ha ka Second Division bad u Hamarbanjop Khongsit (Young Boys SC) ha ka Third Division. Ïa ka nam Best Player la ïoh da u Pynkupbor Kharbteng (Umkaber SC) ha ka First Division, Lestarjune Umdor (Mawsawrit SC) ha ka Second Division bad u Provincial Rani (Mawsadang SC) ha ka Third Division.
Ïa ki khusnam sha kitei ki kynhun la sam da u Bah Hamphrey Lyngdoh, Lyngdoh Hima Lyngïong kum u symbud kongsan ryngkat u Bah Dlipstar Rani, Principal ka Tyrsad Higher Secondary School, ki dkhot ka TASA bad kaiwei kiwei.
