Shillong, Rymphang 10
Ka Jylla ka la duh noh ïa ka ‘thei ïalehkai kriket ka samla (L) Avril Celzia Kharsyiem kaba la khlad noh ha ka sngi Ba-ar na ka jingban ka jingshitom la kumba katto katne por.
Kane ka samla ka dei ka khun jong i Kong Evelyntis Kharsyiem bad Bah (L) Shanlang Warjri, ba shong basah ha Mairang Mission (Bangla), Eastern West Khasi Hills.
Kumba ka paw ka samla (L) Avril ka dei kaba la ju shim bynta ha ki lympung ïalehkai jong ka Meghalaya Cricket Association (MCA). Ka la long ruh ka nongïalehkai ba kongsan ha kaba ka la mihkhmat ruh ïa ka Jylla ha ka kyrdan ïalehkai U-23 bad kynhun ïalehkai Senior.
Kham hashwa ka samla (L) Avril ka dei ruh ka nongïalehkai phutbol bad ka la shim bynta ha ki katto katne ki lympung ïalehkai phutbol hapoh ka Jylla.
Te kumta kane ka jingkhlad noh ka la long ka jingduh kaba nyngkong eh ïa ka ïing ka sem hi baroh kawei, kumjuh ïa ki para nongïalehkai, ki coach lem bad baroh kiba ïathuh ithaw bad kiba don ka jingïadei kaba jan.
Na ka liang ka Meghalaya Cricket Association ka la phah ka jingsngewlem sha katei ka longïing kaba mad ïa katei ka sngewsih bad ka jingwan tap u lyoh uba dum ïa ki.
Ha kawei pat ka liang u President barim ka MCA u Naba Bhattacharjee u la ong, “Nga sngewsih halor ka jingkhlad noh ka samla (L) Avril. Nga kynmaw ïa ka ha ka por ba ka wan sha ka prokram jied khynnah (selection camp) ba ka la lah ban pyni shisha ïa ka sap ïalehkai jong ka bad ka la shah jied ban mihkhmat ïa ka Jylla. To ai ba ka mynsiem jong ka kan ïohthiah ha kaba suk. Nga phah ka jingsngewlem ruh sha baroh ki dkhot jong ka longïing longsem kiba mad ïa kane ka jingduh noh kaba khraw.”
Kumjuh u Secretary ka MCA u Bah Rayonald Kharkamni u la thoh ha rynsan social media, “Shongthait ha kaba suk Avril, ka jingduh kaba khraw ka long ïa ka MCA bad ïa ka ïing ka sem”.
Ïa ka met kaba sah jong ka, yn pyndep ha ka 12 tarik ha ka por 2 baje nohphai sngi ha u lum jingtep ka Balang Presbyterian Mairang.
