Shillong, Rymphang 10
Ka jingpynïakap kaba khatduh na ka bynta AFC U17 Asian Cup Saudi Arabia 2026 bad ka AFC U17 Women’s Asian Cup China 2026 kan long ha ka sngi Palei ha Kuala Lumpur, Malaysia.
Ha ka 21st AFC U-17 Asian Cup, kin don 16 tylli ki kynhun ha kaba yn phiah ïa ki ha ki saw tylli ki ban ïakhun pyrshah. Ka India ka la long kawei napdeng ki hynñiew tylli ki kynhun kiba la lah ban pynthikna ban jam sha kane ka lympung lyngba ka jingïaknieh rung, na ka bynta ban ïasoh lang bad ka Saudi Arabia ryngkat ki phra tylli kiba mihkhmat ïa ka AFC sha ka FIFA U17 World Cup Qatar 2025, kiba la ïoh rung lypa.
Ka India ka la don ha ka kyrdan ba hakhlieh jong ka Group-D ha kaba ka la tam ïa ka IR Iran, Lebanon, Palestine bad ka Chinese Taipei ha ka lympung ïaknieh rung kaba la long ha u Naiwieng jong u snem 2025 na ka bynta ban ïoh rung sha ka AFC U-17 Asian Cup ha ka sien kaba shiphew ha ka jingïaid lynti sha katei ka lympung.
Ïa katei ka lympung la khmih lynti ban pynlong naduh 5 haduh 22 tarik u Jymmang. Ki ar tylli ki kynhun ki ban ïoh rung na kawei pa kawei ka group kin ym ïoh rung sha ka quarter-final, hynrei sha ka FIFA U-17 World Cup Qatar 2026.
Na ka bynta katei ka jingpynïakap jong ka AFC U-17 Asian Cup Saudi Arabia 2026, ka India ka la don ha ka Pot-3 ha kaba la kynthup lang ïa ka Saudi Arabia, Korea Republic, Japan, lane ka Uzbekistan na ka Pot-1, ka Tajikistan, Australia, Yemen, lane ka Indonesia na ka Pot-2, bad ka DPR Korea, United Arab Emirates, Qatar lane ka Myanmar na ka Pot 4.
Katba ka Saudi Arabia kum ka nongpynlong ïa kane ka lympung, ka la ïoh rung sha ka thup kaba hakhlieh na ka bynta ban ïoh jaka ha A1.
Na ka bynta ka 10th AFC U-17 Women’s Asian Cup, kin don 12 tylli ki kynhun ha kaba yn phiah ha ki lai tylli ki group ki ban don mar saw tylli. Ka India ka la long kawei napdeng ki phra tylli ki kynhun kaba la ïoh jaka lyngba ka lympung ïaknieh rung, ban ïasoh lang ryngkat ka China PR bad saw tylli kiba mihkhmat ïa ka AFC ha ka FIFA U-17 Women’s World Cup Morocco 2025, kiba la ïoh rung lypa.
Ka India kaba la bat ïa ka kyrdan ba hakhlieh ha ka Group-G kata hakhlieh ïa ka Kyrgyz Republic bad ka Uzbekistan ha ki lympung ïaknieh kaba la long ha u Risaw jong u snem 2025 na ka bynta ban ïoh rung sha ka AFC U-17 Women’s Asian Cup hadien 21 snem.
Ïa kane ka lympung la thmu ban pynlong naduh 1 tarik haduh 17 tarik u Jymmang. Na ka bynta ka jingpynïakap kaba khatduh, ka India ka la don ha ka Pot-3 bad kan shah pynïakap lang ryngkat ka China PR, DPR Korea, lane ka Japan na ka Pot-1, ka Korea Republic, Thailand, lane ka Australia na ka Pot-2, bad ka Chinese Taipei, Myanmar, lane ka Lebanon na ka Pot-4.
Ka China PR kum ka nongpynlong ïa kane ka lympung, ka la bat ïa ka kyrdan jong ka A1.
Ki ar tylli ki kynhun ki ban wan ha ki kyrdan ba hakhlieh na kawei pa kawei ka group ryngkat ki ar tylli ki kynhun ki ban wan ha ki kyrdan balai, kin jam sha ka quarter-final. Katba ki saw tylli ki kynhun ki ban rung semi-final kin ïoh rung sha ka FIFA U-17 Women’s World Cup Morocco 2026, ha kaba ka DPR Korea ka la ïoh rung lypa.
