Shillong, Rymphang 10
Ka Manchester City ka lah ban buh jingeh ïa ka Arsenal kaba dei ka kynhun kaba danglamkhmat ha ka Premier League ha kaba ka lah ban tam sa tang 3 poiñ ha kane ka kynhun jong u Pep Guardiola kan ïakynduh pyrshah ïa ka Fulham ha ka sngi Palei, kaba long ka sngi ba ka Arsenal kan leit sha ka Brentford.
Kumba ka long mynta ka Arsenal ka don hapdeng ka jingïaknieh ban ïoh ïa ka nam lahduh ha ka sien kaba nyngkong ha ki 22 snem, hynrei ha ka jingïalehkai kaba la long ha ka sngi U Blei ka City ka la lah ban pynliem noh ïa ka Liverpool da 2-1 kol kaba pyni ïa ka jingwanphai biang kane ka kynhun jong u Pep Guardiola.
Sa kawei pat ka jingshah rem ka la pynjulor ïa ka lad jong ka Liver -pool ban rung sha ka Champions League bad ka kynhun jong u Arne Slot ka la ïakynduh pyrshah ïa ka Sunderland ha ka sngi Palei.
Katba ka Tottenham bad ka Newcastle kiba la don hapdeng ka jingma namar ki la don ha ki kyrdan ba kham shatrai bad kane ka buh jingeh ïa ka lawei jong ki manager kata u Thomas Frank bad u Eddie Howe.
Ka City ka la pynlong ïa ka jingmlien ban wanphai da ka jingkhlaiñ bor hapoh ka jingïalam u Guardiola na ka bynta ban khur ïa ka nam lahduh kaba hynriew tylli ki aïom ïalehkai ha England, hynrei ka la jop tang ar sien na ki hynñiew tylli ki jingïalehkai ha kane ka aïom ïalehkai 2026.
“Ngi donkam ban don ïa ka jingsngew skhem bad ban sdang da ki jingjop ha manla ki jingïalehkai. Kane ka dei kaba kongsan ha kaba kut,” la pynpaw u Erling Haaland, uba dangïai thrang ban khur ïa ki nam lahduh na ka bynta ka kynhun.
Utei u rangïalehkai na Norway u la long uba hakhmat eh ban ïohpdiang ïa ka ‘Golden Boot’, hynrei u la thep tang shisien na ki 13 tylli ki jingïakhun.
“Watla ngam shym la lah ban thep kol naduh kaba sdang jong une u snem, hynrei nga donkam ban kiew ha ka rukom ïalehkai,” la bynrap u Haaland.
Da ka jingkiew ha ka rukom ïalehkai hashwa ba ka Arsenal kan leit sha ka Etihad hapdeng jong u Ïaïong, ka City ka don ka lad ban tynjuh bor pyrshah ïa katei ka kynhun.
Kumba ka paw katei ka kynhun u Mikel Arteta ka la lah ban wanphai da ka jingkhlaiñ bor ha u Kyllalyngkot mynta u snem ha kaba ka la khur jingjop saw sien ha baroh ki jingïakhun.
Hynrei ka Brentford ka la shah rem tang arsien ha la ïing ha kane ka aïom bad kane ka lah ban buh jingeh ïa ka jingangnud jong u Arsenal ban kynjoh sha ka nam lahduh.
