Shillong, Rymphang 10
Ka Pakistan Cricket Board (PCB) ka la shim ïa ka sien jam ban pynkylla noh ïa ka rai jong ka ban ym ïakhun pyrshah ïa ka India ha ka T20 World Cup 2026 kaba dangïaid shakhmat.
Katkum ki khubor ba dangshen, hadien ki jingïakynduh ba dang shen, ka Pakistan kan sa leit sha Colombo bad kan ïakhun pyrshah ïa ka India ha kane ka lympung ïalehkai kaba dangïaid shakhmat ha ka 15 tarik mynta u bnai.
Lah ban kdew ba hadien ka jingshah rem baroh kawei hapdeng ka India bad ka Bangladesh, ha kaba ka kynhun ka la shah weng noh na ka T20 World Cup hadien ba ka la kyntait ban leit sha India, ka Pakistan ka la ïeng ha ka jingïatylli lang bad ka Bangladesh, bad tang hadien katto katne por, ka sorkar Pakistan ka la wan shakhmat bad pynbna ba ka kynhun kriket jong ki kan ym mih madan pyrshah ïa ka India ka ban long ha ka 15 tarik mynta u bnai ka jingïalehkai ha ka World Cup.
Kaba bud ka long ka jingïalang kaba bud ryntih, bad ka PCB ka la dawa ba dei ban sdang biang ïa ka jingïalehkai arliang mamla bad ka India; nangta, ki la pan ban don ka tri-series hapdeng ka India, Pakistan, bad Bangladesh. Ki la kyntu ruh ba ka India ka dei ban sha Bangladesh ha kawei pat ka wat jingïakhun ba khatduh jong mynta u snem.
Ïa kijuh ki jingdawa la kyntait namar ba ka ICC ka la pynpaw ba ka rai ban bteng ïa ka jingïalehkai arliang mamla ka shong ha ka BCCI, bad ka ICC kam don kyntien eiei halor kane ka bynta. Da ki jingjia, ka kaiphod kaba thymmai ka la pynpaw ba ka PCB kan ïakynduh pyrshah ïa ka India ha ka 15 tarik mynta u bnai.
