Shillong, Rymphang 10
Ka lympung ïalehkai Super Division Cricket League 2026 ba la pynïaid da ka Shillong Cricket Association ka la nangjam shaphrang ha kaba ka Nongthymmai SCC ka la pynliem noh ïa ka Lumpyngngad SSCC da 1 wiket ha ka sngi Ba-ar.
Ha kane ka jingïakhun kaba la long ha madan ïalehkai jong ka MCA kaba ha Polo, ka Lumpyngngad ka la kam trai ban tied nyngkong ha kaba ka la kamai 120 run bad shah pynkhyllem baroh ki nongtied ha ki 32.1 over. Kane ka la wan lyngba ka jingïalehkai bha ki nongkawang bol ka Nongthymmai kata u Anmol Sunar uba la khur 4 wiket bad ïa ki 3 wiket la ïoh da u Sagar Chettri. Katba ki nongtied ka Lumpyngnad kiba kynthup ïa u Vishal Kumar Balmiki u la tied 40 run na ki 60 bol bad u Krishna Thapa u la ïoh 24 run na ki 38 bol.
Haba wan shimti ïa pali kaba ar, ka Nongthymmai ka la lah ban kynjoh sha ka thong da kaba kamai 121 run bad shah pynhap 9 wiket ha ki 41 over. Kane ka la wan lyngba ka jingïalehkai bha da u Ranjit Kumar Rai, uba la ïoh ban khyrwit ïa ka shiteng spah kaba 56 run na ki 79 bol bad u Badonam John Mylliemngap u la ïoh 13 run na ki 68 bol. Katba u Rahul Shah u la khur 3 wiket bad ïa ki 4 wiket la ïoh da u Mukesh Kumar Rai na ka bynta ka Lumpyngngad. Ïa ka nam Player of the Match la ïoh da u Anmol Sunar.
