Shillong, Rymphang 11
Ka Sporting CC ka la khur ïa ka jingjop ha ka Super Division Cricket League 2026 ba la pynlong da ka Shillong Cricket Association, hadien ba ka la lah ban pynliem noh ïa ka Lok Bhawan CC da 3 wiket ha ka sngi Balang.
Ha kane ka jingïakhun kaba la long ha madan ïalehkai kriket jong ka MCA ha Polo, ka Lok Bhawan kaba la jop ïa ka kynting pisa ka la shimti ban tied nyngkong ha kaba ka la kamai 191 run bad shah pynhap 10 wiket ha ki 35.3 over. Kane ka la wan lyngba ka jingïalehkai bha u Gagandeep Singh uba la khur 5 wiket bad ïa ki 3 wiket da u Indrajit Rai. Katba ki nongtied ka Lok Bhawan kata u Vishal Kanwar u la khyrwit ïa ka shiteng spah kaba 59 run na ki 74 bol lem bad u Ayushman Das uba la ïoh 58 run na ki 73 bol.
Haba wan shimti ïa ka pali kaba ar, ka Sporting ka la lah ban kynjoh sha ka thong da kaba kamai 192 run bad shah pynhap 7 wiket ha ki 41.4 over. U Rohan Kumar Bidaria u la khyrwit ïa ka shiteng spah kaba 68 run na ki 90 bol bad u Purav Agarwal u la ïoh 28 run na ki 32 bol. Katba u Bikash Singha u la khur 4 wiket bad ïa ki 2 wiket la ïoh da u Suraj Chettri. Ïa ka nam Player of the Match la ïoh da u Gagandeep Singh, uba la kamai 9 run bad ban pynhap 5 wiket.
Ka jingïalehkai ha ka sngi Palei kan long hapdeng ka Nongthymmai SCC pyrshah ïa ka Royal CC naduh ka por 8:30 mynstep.
