Shillong, Rymphang 11
Ka Shillong Sports Association (SSA) ka la pyllait ïa ka almanak ïalehkai na ka bynta u snem 2026 ha kaba ïa ka lympung ïalehkai Shillong Premier League la buh ban sdang ha ka taïew kaba nyngkong u Jylliew bad ka Champions Cup la buh ban sdang ha u Risaw.
Kat kum ka shithi ba la phah da u General Secretary U Bah Dipshon Lyngdoh Nongbri sha baroh ki synjuk ïalehkai kiba la pynïasoh bad ka SSA, la ong ba ka jingdie ïa ki form na ka bynta ka jingpynthymmai na ka bynta ki klob (renewal) kan long ha ka taïew ba nyngkong bad ba-ar u Rymphang bad ka jingpynpoi ïa ki form kan long ha ka taïew ba khatduh u Rymphang.
Ka jingdie ïa ki form na ka bynta ka jingkynriah klob ki rangïalehkai ne ka Player’s Transfer bad ka Inter Club Transfer kan long ha ka taïew kaba nyngkong jong u Lber bad ka jingsoi soskular jong ki rangïalehkai hakhmat ka shlem treikam jong ka SSA kan long naduh 21 haduh 31 tarik u Lber.
Katei ka synjuk la la pynbna ruh ba kan sdang ïa kane ka aïom ïalehkai da ka U-20 Fourth Division naduh ka taïew kaba nyngkong u Ïaïong haduh 2 tarik u Jymmang, katba ka Third Division kan sdang naduh ka taïew kaba nyngkong u Ïaïong haduh 2 tark u Jylliew.
La ong ba ïa ka Second Division la buh ban sdang ha ka taïew kaba nyngkong u Jymmang haduh 25 tarik u Jylliew, katba ka First Division la buh ban sdang naduh ka taïew kaba lai jong u Naitung haduh ka taïew kaba khatduh jong u Nailar.
Shuh shuh ka SSA ka la pynbna ruh ba kan sdang ïa ka Shillong Premier League (SPL) ha ka taïew kaba nyngkong u Jylliew haduh 20 tarik u Naitung, katba ka Champions Cup la buh ban sdang naduh u Risaw.
Ka SSA ka la pynbna ruh ïa ki lympung ïalehkai jong ki khynnah bad kynthei ha kaba ïa ka Under-15 bad ka Under-13 la buh ban sdang ha ka taïew kaba ar jong u Naiwieng bad ka 1 tarik u Nohprah, katba ka Women’s Football League la buh ban sdang ha Nohprah bad ban pynkut ha u Kyllalyngkot jong u snem 2027.
