Shillong, Rymphang 11
U Thomas Frank u la shah weng noh shi syndon ha ka Tottenham bad kane ka la pynkut noh ïa ka jingïaid lynti kum u coach hadien ba kane ka kynhun ka la shah rem noh ha la ïing hakhmat ka Newcastle ha ka sngi Balang, kaba pynlong ïa ka Spurs ban sah ha ka kyrdan kaba khadhynriew ha ka Premier League, da kaba tam da 5 poiñ na u laiñ jong ka jingma.
Ki paidbah kiba la pyndap hapoh ka stadium jong ka Tottenham Hotspur ki la sawa jam da ka jingpyrta pyrshah ïa u Frank ba u dei ban shah weng.
U Thomas Frank u pyrshang ban ïoh ka jingbthah ïa ki nongïalehkai ka Tottenham halor ka jingshah rem ha ka Newcastle.
Utei u coach uba na Denmark, uba la shah thung ban shimti ïa katei ka kynhun ha ka 12 tarik u Jylliew na ka bynta ka kontrak kaba lai snem hadien ba u la shimti ha ka jaka u Ange Postecoglou, uba la mih noh hadien ki phra tylli ki jingïalehkai kiba khlem da lah ban khur jingjop. Kane ka kynhun ka la jop tang ar sien na ki 17 tylli ki jingïalehkai. Te kumta kane ka kynhun ka la don hatmier jong ka riat kaba long ka jingshah pynhiar kyrdan.
Ka jingïalehkai jong kane ka klob ha ka Champions League ka la long kaba biang eh ha kaba ka la don ha ka kyrdan kaba saw bad ka la pynlong ïa ka ban rung sha ka pre-quarter final, hynrei ka jingsngew pyrshah ïa u Frank da ki nongkyrshan ka lah ban wanrah ka jingsniew dur ïa kane ka kynhun.
Dei katno katno ruh ka jingbym lah u Frank ka la wanrah ka jingïapher hapdeng jong u bad ki nongkyrshan katei ka klob bad kaba pynlong ka jingkut na ka bynta jong u. Kane ka kynhun ka la ïakynduh jingeh ha kane ka jingïaid lynti bad ka jingkylli mynta ka long ïano kane ka klob kan wanrah na ka bynta ban shimti kum u nongïalam ïa ka kynhun.
Kumba ka paw u Frank um shym la ïoh ïa ki nongïalehkai kiba biang ha ka bynta kaba shakhmat. U Richarlison u la thep hynñiew kol ha kane ka lympung, hynrei u Mohammed Kudus, Xavi Simons, Wilson Odobert, Mathys Tel bad u Randal Kolo Muani ki la lah ban thep tang hynriew kol hapdeng jong ki ha ki jingïakhun. U Dominic Solanke um shym la ïoh ban ïalehkai na ka daw jong ka jingmynsaw ha ka kjat jong u. Naduh ba u la wanphai, u la thep tang ar tylli ki kol ha katei ka lympung.
Ha ka jingshisha ki bor ba dei khmih jong ka Spurs kim shym la kwah ban weng ïa u Frank, hynrei ka dei na ka daw ka jingeh jong u kaba la pynlong ïa ki ban shim ïa katei ka rai. Ka jingbun kiba mynsaw ha ryngkat ka jingmih noh u Frank ka lah ban buh jingeh ha ka Champions League.
