Shillong, Rymphang 11
Ka shi kol ba la thep shwa ban wai da u Benjamin Sesko ka la pynlong ïa ka Manchester United ban ïakhaid mar 1-1 kol bad ka West Ham ha ka sngi Balang kaba la pynkut noh ïa ka jingsdang kaba paka jong u Michael Carrick kum u Manager, katba ka jingshah rem ka Tottenham ha ka Newcastle da 2-1 kol ka la buh jingeh ïa u Thomas Frank kum u coach ba hakhlieh duh jong ka Tottenham.
Ha kane ka jingïakhun ka West Ham ka la lah ban ïalehkai bha bad ka la lah ban khanglad ïa ka jingangnud ki nongkyrshan ka United hadien ba ka la jop san sien lynter. Kane ka jingïakhaid ka la long ka jingïarap ïa ka West Ham ba ka kan dangïaineh ha ki kyrdan ba kham shajrong watla ka la don ïa ki lai poiñ.
Kumba ka paw ka United ka la jop saw sien lynter naduh ba shimti da u Carrick haduh kane ka jingïakhaid. Kine ki jingjop ki la pynlong ïa u ban dangïai sah haduh kaba kut ka aïom ïalehkai. Hynrei ka West Ham ka la khanglad ïa ka jingïaleh-kai bha ka United hadien ba ka kynhun jong u Carrick ka la jop ïa ka Arsenal, ka Manchester City bad ka Tottenham ha ki taïew ba la dep.
U Tomas Soucek u la ïoh ban pynkhihjar ha kaba sdang jong ka kylla miet hadien ka jingïarap pynbuh da u Jarrod Bowen na ka bynta ban pynlong ïa ka West Ham ban tam shi kol. Hynrei hashwa ban wai ka United ka la lah ban pynphai kylla lyngba u Sesko uba la ïoh ban pyndei ïa ka bol ba la pynbuh da u Bryan Mbeumo.
“Ngim shym la lah ban ïalehkai bha kumba ngi angnud,” la ong u Carrick.
“Ngim shym la don kata ka jingstad ban pynurlong ïa ka jingjop. Ka mynsiem ïakhun ka la pynlong ban kamai poiñ bad ban nangjam sha-phrang.”
Kane ka jingïakhaid ka la pynlong ïa ka United ban dangïai neh ha ka kyrdan saw hadien ba ka Chelsea ka la ïakhaid da 2-2 kol bad ka Leeds.
Ka West Ham ka la lait na ka jingma hadien ba ka la kiew ar poiñ. Mynta ka Tottenham ka la don ha ka kyrdan ba 16 bad ka la tam 5 poiñ na u lain jong ka jingma.
