Shillong, Rymphang 11
Ka kynhun ki rangïalehkai kiba palat 40 snem jong ka Meghalaya ka la khur ïa ka nam lahduh ha ka lympung ïalehkai 8th National Masters Games 2026, kaba la kut dangshen ha Pimpri, Pune, hadien ba ka la lah ban pynliem noh ïa ka Kerala da 2-0 kol ha ka jingïakhun phainal.
La mihkhmat ïa ka Jylla da ka Rympei PIP, kane ka kynhun ïalehkai ka la lah ban ïalehkai bha naduh kaba sdang kat haduh ba ka la ïoh ban khur ïa ka takma ksiar. Kane ka jingjop ka la long kaba khraw na ka bynta ka Jylla ha ka rynsan ïalehkai jong ka ri.
Ka jingjop ka la pynthikna ïa ka jingkordor kaba kham khraw namar ka pynpaw ïa ka rukom ïalehkai phutbol kaba khlaiñ jong ka Jylla, ha kaba ki nongïalehkai ki dangïai bteng ban ïashim bynta shit rhem ha kane ka jingïalehkai wat hadien ba ki la shongthait na ka kam ïalehkai. Kane ka jingjop ka pyni ïa ka jingaiti lut jong ki nongïalehkai ha ryngkat ka jingkoit jingkhiah, bad ka mynsiem ïalehkai hapdeng jong ki.
Kane ka National Masters Games ka la lum lang ïa ki nongïashim bynta na kylleng ka ri, kynthup ïa ki riew shemphang kiba dangbiang ha ka met ka phad, ki nongkhaïi, ki briew kiba la shongthait bad kiba ieid ïa ka jingkilan met. Watla ka Meghalaya mynta kam pat don ïa ka Masters Games Associa -tion, hynrei la ai jingbit kyrpang ïa ka kynhun ïalehkai ka Jylla ban ïashim bynta ha kane ka lympung.
Katkum ka jingïathuh, la ong ba kane ka jingleit ïashim bynta ka la plie lad ban sdang bad kyntiew ïa ka jingthaw ïa ka Masters Games Association ha kane ka Jylla. Kum kane ka jingthmu kan ïarap ban pynshlur ïa ki nongïalehkai ba la rim ha ka Jylla ban dangïalehkai bad ban noh synñiang na ka bynta ban kyntiew ïa ka jingïalehkai bad ka jingim kaba koit ba khiah.
Kane ka Masters Games ka thmu ruh ban kyntiew ïa ka jingïatylli, ka jingïalong paralok bad ka jingïasngewthuh jingmut hapdeng ki nongïashim bynta, khlem da peit ïa ka jingïapher ha ka rta hapdeng ki jingïashim bynta, ka niam bad ka tynrai ha ki jingïalehkai.
