Nongstoiñ, Rymphang 11
Ka Mawjai FC na South West Khasi Hills ka la jam sha ka semi final jong ka lympung ïalehkai Open to all Knockout Football Tournament 2025-26 ba la pynlong da ka New Nongstoiñ Sports Social & Cultural Club.
Kane ka nam jop ka la wan hadien ba ka la pynliem noh da 3-2 kol ïa ka ALO na West Khasi Hills lyngba ka tie-breaker hadien ka jingïakhaid da mar shi kol ha ka jingïalehkai quarter final kaba ar kaba la long ha ka sngi Balang ha madan New Nongstoiñ.
Haba phai sha kane ka jingïakhun hapdeng kine ki ar tylli ki kynhun, dei ka Mawjai FC kaba la ïoh ban pynkhih jar nyngkong lyngba u Manso Marweiñ ha ka minit kaba 71, hynrei ha ka minit kaba 90+2 minit ka ALO ka la pyniakhaid kylla lyngba u Amosly Nongbri. Ïa ka nam Man of the Match la ïoh ban khur da u Pyrkhat Khardewsaw na ka Mawjai FC.
Lah ban kdew hangne ba ha kane ka lympung ki don haduh 16 tylli ki kynhun na kylleng ki jaka ki la wan ban ïashim bynta bad ka khusnam ka long da ka song pisa kaba kynthup ïa ka lahduh bad kaba wan ba-ar ka long T. 3 lak tyngka
Na ka liang ka NNSSCC ka la pyntip ba ka jingïalehkai quarter kaba lai kan long ha ka 19 tarik mynta u bnai hapdeng ka Evergreen na EKH pyrshah ïa ka Dommawlieh na WKH ha ka por 1.50 nohphai sngi.
