Shillong, Rymphang 12
Ka kynhun ki rangïalehkai ka India ka la shah pynngat ryngkat ka Uzbekistan, Australia bad ka DPR Korea, ki ban don ha ka Group-D jong ka AFC U17 Asian Cup Saudi Arabia 2026, hadien ba la pynïakap ïa ki kynhun ha ka sngi Palei ha Kuala Lumpur, Malaysia bad kane ka lympung kan sdang naduh 5 haduh 22 tarik u Jymmang.
Ka India ka la ïoh rung sha kane ka lympung ha ka sien kaba shiphew hadien ba ka la wan kham hakhmat ïa ka IR Iran, Lebanon, Palestine bad ka Chinese Taipei ha ka lympung ïaknieh. Te kumta ka India kan ïakhun nyngkong pyrshah ïa ka Australia, ha kaba yn bud sa ka jingïakhun pyrshah ïa ka Uzbekistan bad ka DPR Korea.
Ka Uzbekistan kaba la long ka lahduh ka la don lypa ha kane ka lympung. Ka Australia ka la shah tem noh ha ka jingïalehkai ‘group’ ha ka lympung ïalehkai jong u 2025 bad ka la ïoh rung biang ha u 2026 hadien ba ka la jop ïa ka Jordan, Bhutan bad ka Philippines. Ka DPR Korea kaba la jop arsien, ka la rung sha ka semi-final ha u snem 2025, kumta ka la ïoh rung biang sha kane ka lympung.
Ha ka Group-A ki kynthup ïa ka Saudi Arabia kaba pynlong ïa kane ka lympung ryngkat ka Tajikistan, Thailand, bad ka Myanmar. Ha ka Group-B ki kynthup ïa ka Japan, Indonesia, China PR bad ka Qatar. Katba ha ka Group-C ki long ka Korea Republic, Yemen, Vietnam bad ka United Arab Emirates.
Ki ar tylli ki kynhun ki ban wan ha ki kyrdan ba hakhlieh na kawei pa kawei ka group kin ïoh rung sha ka quarter-final bad kin ïoh rung ruh sha ka FIFA U-17 World Cup Qatar 2026.
