Shillong, Rymphang 12
Ka Royal Cricket Club ka la pynliem noh ïa ka Nongthymmai SCC da 127 run na ka bynta ban khur ïa ka jingjop ha ka lympung ïalehkai Super Division Shillong Cricket League 2026 ba la pynlong da ka Shillong Cricket Association ha ka sngi Palei.
Ha kane ka jingïakhun kaba la long ha madan ïalehkai kriket jong ka MCA kaba ha Polo, ka Royal Cricket Club ka la kam trai ban tied nyngkong ha kaba ka la lah ban kamai haduh 308 run bad shah pynkhyllem baroh ki nongtied ha ki 38.4 over. U Raj Biswa u la lah ban pynpaw ïa ka jingtbit da kaba u la khyrwit ïa ka spah run kaba 124 na ki 65 bol bad u Pringsang Sangma u la ïoh 32 run na ki 24 bol. Katba u Ram Najiar bad u Badonam John Mylliemngap ki la khur mar 2 wiket na ka bynta ka Nongthymmai.
Haba wan beh ïa ka thong, ki nongtied ka Nongthymmai ki la shah pynkhyllem lut baroh na ka bynta ban kamai tang 181 run ha ki 37.2 over. U Shankar Balasubramaniam u la khyrwit ïa ka shiteng spah kaba 52 run na ki 78 bol bad u Sagar Chettri u la ïoh 31 run na ki 36 bol. Katba u Abhishek Kumar bad u Raj Biswa ki la khur mar 3 wikwt na ka bynta ka Royal Cricket Club. Ïa ka nam Player of the Match la khur da u Raj Biswa, uba la kamai 124 run bad khur 3 wiket.
Ka jingïalehkai ha ka sngi Thohdieng kan long hapdeng ka Sputnik CC pyrshah ïa ka Langsning CC naduh ka por 8:30 mynstep.
