Shillong, Rymphang 12
Ka ophis u Sub-Divisional Officer (Civil), Amlarem Sub-Division, ha ryngkat ka jingïatreilang bad ka Amlarem Sub-Divisional Sports Association (ASSA), ka la pynkhreh ban pynlong ïa ka Amlarem Golden Jubilee Marathon 2026 ha ka 7 tarik u Lber bad kane ka long kum shi bynta jong ka jingrakhe ïa ka jingdap 50 snem ka Amlarem Sub-Division.
Kane ka marathon ka long na ka bynta ki samla kynthei bad shynrang kiba 16 snem shaneng. Ka jingjngai na ka bynta ki shynrang ka long 10 Kilometre bad yn sdang na Pdengshakap ha ka por 5 baje mynstep, katba na ka bynta ki kynthei ka jingjngai ka long 7 kilometre ha kaba yn sdang na Amtasam ha ka por 5 baje mynstep. Ka jaka ban pynkut na ka bynta baroh ar tylli ki thup ïakop mareh kan long ha ophis Sub-Divisional Officer (Civil), Amlarem.
Katkum ka kyrwoh ba la pyllait da u Sub- Divisional Public Relations Officer jong ka Amlarem Sub-Division, la ong ba la pynkhreh ïa ki khusnam pisa na ka bynta ki nongjop kynthei bad shynrang kaba long T. 10,000 ïa kiba wan ba nyngkong, ba-ar kin ïoh T.7,000 bad T. 5,000 ïa kiba wan balai.
La ong ba kane ka marathon ka long na ka bynta ki nongshong shnong kiba hap hapud u sam jong ka Amlarem Civil Sub-Division. Ki dei ban wanrah ïa ki kot ki sla ki ban pynshisha ïa ka snem kha kata ka EPIC ne Aadhaar Card bad syrnod sngi kha.
La bthah ba ki nongïashim bynta baroh ki dei ban wan poi ha ki jaka sdang ha ka por 5 baje mynstep bad ban jingïatreilang bad ki ophisar ban pynthikna ïa ka jingïaid beit katei ka marathon.
Ka Golden Jubilee Marathon ka dei ka jingïalehkai kaba kyrpang kaba pynpaw ïa ka jingïatylli, ka mynsiem ïalehkai, ka bor jong ki samla bad ka jingsngew sarong jong ka imlang sahlang katba Amlarem ka rakhe ïa ki 50 snem jong ka jingïaid shaphrang.
