Shillong, Rymphang 12
Ka Churchill Brothers, kaba la bat shipor ïa ka kyrdan ba hakhlieh eh jong ka I-League ha ka samoi ïalehkai ba la dep bad kaba la thmu ban kiew kyrdan sha ka Indian Super League (ISL), kan ym don bynta ha katei ka kyrdan ïalehkai kaba hakhlieh duh jong ka samoi ïalehkai 2025-26, la pynbna ka All India Football Federation (AIFF) ha ka sngi Palei.
Ïa kane ka rai la shim ha ka jingïalang jong ka Executive Committee kaba long lyngba ka video conference, tang ar sngi shwa ban sdang katei ka lympung ïalehkai. Ha kane ka jingïalang la mynjur lang ba ka Churchill Brothers kam dei ban don bynta ha kane ka jingïakhun ka ban wan.
Ka jingïalang jong ka Executive Committee ha kaba nyngkong la buh ban long ha ka 9 tarik mynta u bnai, hynrei la pynkynriah noh hadien ba ym shym la lah ban pynbiang ïa ka jingdon jong ki dkhot jong ka.
Kane ka rai ka wan ruh hadien shisngi ba kiba bun ki klob jong ka ISL ki la thoh sha ka AIFF bad kyntu ban ym kynthup ïa ka Churchill Brothers. Ki la kynthoh, napdeng ki daw kiba bun, ba ka jingïaid jong ka lympung ïalehkai ka lah ban wanrah ka jingthud namar ki kynrum kynram.
Ka jinglong jingman ka la mih hadien ba la pynbna ïa ka Churchill kum ka nongjop ba shipor jong ka I-League. Hynrei kane ka nam lahduh ka la shah knieh noh na ka hadien ba ka Inter Kashi kaba wan ha ka kyrdan ba-ar ka la ïoh ban khur saw poiñ hadien ka rai jong ka Court of Arbitration of Sport (CAS).
Ha kaba nyngkong, ka Inter Kashi ka la shah pynshitom ha ka Appeals Committee jong ka AIFF namar ba ka la pynïalehkai da u nongïalehkai u bym dei hok ban ïalehkai, ïa katei ka rai la weng noh hadien ba la ujor sha ka ïingbishar ba ha khlieh duh jong katei ka jingïalehkai.
Na ka liang u kapten barim ka India bad uba long u dkhot jong ka Executive Committee ba mynta, u Bhaichung Bhutia u la buh jingkylli ïa ka rukom pynïaid kaba wanrah ka jingkulmar. U la pynpaw ruh ba ka jingrai da ka ïingbishar na ka bynta ka nam lahduh, kam long kaba dei hok ïa kano kano ka klob.
“Balei ba don kane ka jingïalang haba ka lympung ïalehkai kan sdang hadien san sngi? Kata hi ka pyni ïa ka jingbakla ha ka rukom pynïaid. Bad phi pynlong biang ïa ka jingïalang ban rai la ki dei ban shah ne em! Kaba ar, balei ka jinglong jingman ka la wan hangne bad kane ka pyni ba la thaw hi da ka synjuk,” la bynrap u Bhutia, uba dei u dkhot jong ki 22 ngut hapoh ka Executive Committee.
