Shillong, Rymphang 12
Palat 1,300 ngut ki nongïalehkai ki la shah weng noh na ka prokram jong ka Khelo India ha kine ki san snem ba la dep namar ki jingeh ha ka rukom ïalehkai bad ka jingpynkheiñ ïa ka aiñ ïalehkai ne doping, la pynpaw u Myntri ka tnat ïalehkai jong ka sorkar pdeng ka Mansukh Mandaviya ha ka Rajya Sabha ha ka sngi Palei.
Haba jubab ïa ka jingkylli halor ka jingkiew ki nongïalehkai kiba la pynrung kyrteng hapoh katei ka skhim, utei u Myntri u la ong ba ki don 1,342 ngut ki nongïaleh 0kai ki la mih noh na ka prokram ha kane ka por, katba la pynrung 2,905 ngut ki nongïalehkai kiba thymmai.
“Baroh ki don 1,342 ngut ki nongïalehkai kiba la mih noh na ka prokram ha kine ki lai snem ba la dep namar ka jinghiar ha ka rukom ïalehkai kat kum ki kyndon ba la buh bad ka jingdon bynta ha ka jingïaleh pyrshah da kaba pyndonkam ïa ki drok kiba la maham pyrshah,” la ong u Myntri haba jubab ïa ka jingkylli.
U la batai ruh kumno la bishar bniah ïa ka jinglehkai jong ki nongïaleh -kai hapoh kane ka skhim.
“Ïa ki jingthew jong ka jingïalehkai la pynkylla manla u snem bad la pynthymmai ha ka website jong ka Khelo India na ka por sha ka por. Ïa ka jingkiew jong ki nongïalehkai la thew bad bishar thuh manla u snem katkum ki kyndon ba la buh,” la bynrap u Myntri.
Kumba ka long mynta palat 23,000 ngut ki nongïalehkai ki dangshah hikai bad kyrshan ha kylleng ka ri lyngba ka prokram jong ka Khelo India. Ka Talent Iden-tification and Development Committee (TIDC) jong ka tnad ïalehkai ka peit ïa ka jingpynrung bad jingmih jong ki nongïalehkai, hadien ka jingbishar bniah ïa ka rukom ïaleh-kai jong ki nongïalehkai.
Naduh ba la seng ha u snem 2017, ka Khelo India ka thmu ban wad bad kyntiew ïa ki sap ïalehkai ha ki kyrdan ba shapoh. Ka Manu Bhaker kaba long ka nongïalehkai kaba la jop ar sien ha ka Olympic, ka dei kawei na ki nongïalehkai ba paw ba la kyrshan lyngba kane ka skhim.
Kane ka prokram ka ïoh ïa ka bynta kaba kongsan na ka mang tyngka jong ki jingïalehkai manla u snem. Na ka bynta u snem mang tyngka 2026-27, la mang pisa haduh T. 924.35 klur na ka bynta ka Khelo India.
