Shillong, Rymphang 12
Ka India ka la shah pynngat ha kajuh ka thup jong ka Japan, Australia bad ka Lebanon kiba don ha ka Group-B jong ka lympung ïalehkai AFC U-17 Women’s Asian Cup China 2026, hadien ba la pynïakap ïa ki kynhun ha ka sngi Palei ha AFC House kaba ha Kuala Lumpur, Malaysia.
Hadien ba ka la ïoh rung sha ka AFC U-17 Women’s Asian Cup ha ka bynta ka sien kaba nyngkong ha ki 21 snem lyngba ka jinglah ban pynliem ïa ka Kyrgyz Republic bad ka Uzbekistan, ka India kan sdang ïa katei ka lympung ïalehkai da kaba kan ïakynduh nyngkong pyrshah ïa ka Australia, ha kaba yn bud sa ka jingïakhun pyrshah ïa ka Japan bad ïa ka Lebanon. Kane ka lympung kan sdang naduh 1 tarik haduh 17 tarik u Jymmang.
Ka Japan ka la wan ba-ar ha u snem 2024, kumta ka la rung sha kane ka lympung. Ka la long ka kynhun kaba la khur nam lahduh ha ka AFC U-17 Women’s Asian Cup bad kumjuh ha ka FIFA U-17 Women’s World Cup ha u snem 2014 bad wan ba-ar ha u snem 2010 bad 2016.
Ka Australia ka dei ka kynhun kaba la shah rem noh tang ha ka jingïaleh -kai ‘group ha ka lympung ïalehkai kaba la long ha u 2024 bad ka la ïoh rung ha u snem 2026 hadien bad ka la jop ïa ka Singapore bad ïa ka Northern Mariana.
Ha kawei pat ka liang ka Lebanon kan shim bynta ha kane ka lympung ha ka sien kaba nyngkong, hadien ba ka la ïoh rung lyngba ka jingjop ïa ka Kuwait bad ka IR Iran.
Ha ka Group-A ki kynthup ïa ka China PR kaba long ka nongpynlong ïa kane ka lympung, ryngkat ka Thailand, Vietnam bad ka Myanmar. Ha ka Group-C ki kynthup ïa ka DPR Korea, Korea Republic, Philippines bad ka Chinese Taipei.
Ïa kane ka lympung ïalehkai AFC U-17 Women’s Asian Cup China 2026 yn pynlong ha ka nongbah Suzhou kata ha Suzhou Sports Centre Stadium bad ha Suzhou Taihu Football Sports Centre.
Ki ar tylli ki kynhun ki ban wan ha ki kyrdan ba hakhlieh na kawei pa kawei ka group lem bad ar tylli kiba kynsai ki ban wan ha ka kyrdan balai, kin ïoh rung sha ka quarter-final. Katba ki saw tylli ki kynhun ki ban ïoh rung sha ka semi-final, kin ïoh rung sha ka FIFA U17 Women’s World Cup Morocco 2026, ha kaba ka DPR Korea ka la ïoh rung lypa.
