Shillong, Rymphang 13
Ha ka jingjop kaba la wanrah ka jingkyndit lyngba ka jingïalehkai T20 World Cup 2026, hapdeng ka Zimbabwe bad ka Australia, ka Zimbabwe ka la weng noh ïa kawei na ki jingshahrem kaba khraw tam ha ka histori jong ka kriket, da kaba pynliem noh ïa ka Australia ha kane ka kynti ba mynta da 23 ron ha madan ïalehkai R. Premadasa ha Colombo ha ka sngi Thohdieng. Wat hapdeng ka jingpyrshang ba tyngeh jong u Matt Renshaw, ka Zimbabwe ka la ïada ïa ka jingïakhun da kaba kamai haduh 169, kaba pynshisha ba ka jingïalehkai jong ka ha ka jingïakhun pyrshah ïa ka Oman kam shym la long kaba shu jia ryngkhat. Da kaba ïada ïa ka jingïakhun baroh, ka Zimbabwe ka la lah ban pynliem ïa ka kynhun ïalehkai jong ka Australia baroh kawei tang da 146 ron. Kane ka jingjop ka pynlong ruh ïa ka Australia ban eh ba kan ïoh rung sha ka Super 8s Qualification, ha kaba ka jingshah rem pyrshah ïa ka Zimbabwe ka la pynlong ïa ka ban hiar noh sha ka kyrdan ba 3 ha ka thup jong ka Group B. Ha ka jingshisha, ka dei ka sien kaba nyngkong hadien 19 snem ha ka lympung ïalehkai ba heh jong ka pyrthei ba ka Zimbabwe ka la lah ban pynliem biang ïa ka Australia.
Hadien ba la buh ban tied da u Travis, Head kapten jong ka Australia, ki nongïalehkai ba sdang jong ka Zimbabwe ki la sdang da ka jingïalehkai kaba skhem. U Brian Bennett u la ïalehkai bha ïa ka jingïalehkai jong u, da kaba rah ïa ka bat jong u na ka bynta ban kamai 64 ron khlem shah pynhap na ki 56 bol. La kyrshan ïa u da u Tadiwanashe Marumani bad u Ryan Burl, kiba baroh arngut ki la lehkai bha da ki 35 ron jong ki ban pynlong ïa ka jingïabeh thong kaba ïaid beit.
U kapten ka Zimbabwe u Sikandar Raza watla u la ïakhun pyrshah ïa ki jingpang kjat hynrei u la lehkai bha bad kamai stet da 25 ron na ki 13 bol, da kaba pynkut ïa ka jingïalehkai ha ka rukom kaba itynnad bha da kaba tied 6 ron na u Nathan Ellis ban pynpoi ïa ka Zimbabwe sha ka 169/2.
Ha ba phai sha kawei ka jingialehkai pynliem ka UAE ïa ka Canada. Ka jingïakhun kaba phylla jong u Junaid Siddique bad ka kamai shiteng spah snem khlem shah rem jong u Aryansh Sharma ka la pynlong ïa ka United Arab Emirates ban pynliem ïa ka Canada ha ka jingïalehkai jong ka ICC Men’s T20 World Cup ha New Delhi. Ka jingïalehkai ‘bowling’ ba kyrpang jong u Siddique kaba long 5/35 ka la ïarap ïa ka UAE ban khanglad ïa ka Canada ban kamai 150/7, katba u Aryansh u la kamai 74 ron na ki 53 tylli ki bol, da ki 6 tylli ki ‘fours’ bad 3 tylli ki ‘six’, ki la pynskhem ïa ka jingïakhun. Ka jingkamai jong u Sohaib Khan 51 ron na ki 29 tylli ki bol, kynthup ïa saw tylli ki six bad saw tylli ki four, ka la pyndap ïa ka jingpyrshang jong u Aryansh, kaba la ïalam ïa ka UAE sha ka jingjop da kaba sah sa ar tylli ki bol.
Ka jingïalehkai jong ka Canada ka la paw bha da ka jingshah rem kaba kloi, ha kaba u Siddique bad u Muhammad Jawadullah ki la pynpra noh ïa ka kyrdan ba ha khlieh duh. U Harsh Thaker uba la ioh 50 ron bad u Navneet Dhaliwal uba la kamai 34 ron ki la ai katto katne ka jingskhem, hynrei ka jingpynbor jong ka UAE ha kaba kut ka la paw ba ka la palat pud. Ka jingïakhun kaba u Junaid Siddique u la lah ban pynhap 5 wiket, ka dei ka jingïalehkai kaba pawnam bha, kaba pynlong ïa u kum u nongkawang bol ba nyngkong jong ka UAE ban ïoh ïa kane ka jingjop ha ka T20 World Cup.
Bad ha kawei pat ka jinglehkai pynliem noh ka USA ia ka Netherlands. Ka kynhun ïalehkai kriket jong ka USA ka la lah ban jop ïa ka Netherlands da 93 ron, da ka jingai khublei ïa u Saiteja Mukkamalla uba lah ban ioh 79 ron na ki 51 tylli ki bol bad ka jingïalehkai ba itynnad jong u Harmeet Singh ha ka 4/21 bol. Ka jingtied jong u Mukkamalla ka kynthup ia san tylli ki four bad saw tylli ki six, katba u Shubham Ranjane u la ioh 48 ron na ki 24 bol, kaba pynlong ia ka USA ban kyntiew ia ka sha 196 ron.
