Shillong, Rymphang 13
Ka Motor Sports Club of Meghalaya ha ka 13 tarik u Rymphang 2026 ka la pynkup burom ïa 2 ngut ki samla ba pawnam ka Jylla kiba ïalehkai ha ka jingñiah thuk-thuk kiba la jop ha ki jingïalehkai ñiah thuk ha ka Jylla bad shabar ka Jylla.
Kine ki arngut ki samla ki long u Banteilang Jyrwa 28 snem ka rta bad u Jayden Nongkhlaw 18 snem ka rta, la pynkup burom ïa ki ha Shillong Press club.
Haba ïakren sha ki lad pathai khubor, u President ka Motor Sports Club of Meghalaya u Bah Eugene Niangti u la ong ba kine ki arngut ki samla kila jop ha ki jingïakop niah thuk-thuk ha ka Jylla bad shabar ka Jylla bad ki la ïoh ruh ïa ka jingithuh bad bei tyngka da ka TVS bad ong ba ka long khubor kaba ai mynsiem ïa kiwei ki samla ka Jylla ba kin mih shakhmat ban ïashim bynta kum kine ki jait jingïalehkai.
Haba ïakren bad u Banteilang Jyrwa u la ong ba u la sdang ban ïashim bynta ha kane ka jingïalehkai shabar ka Jylla naduh ba u don 20 snem rta bad u la jop ha ba bun ki jingïakop kiba long hapoh bad shabar ka Jylla bad mynta u la ïoh ïa ka jingbei tyngka na TVS ban leit ïalehkai kylleng-kylleng bad ka la long ruh kawei ka lad ïohkam ïohjam ba u la lah mynta ban kyrshan ïa ka ïing ka sem ruh kumjuh.
Na ka liang u Jayden Nongkhlaw u la ong ba naduh dangrit u sngewtynnad ïa kane ka jingïalehkai bad u kpa jong u, u ju ai mynsiem ïa u ban ïalehkai bad u la jop ruh ha ki jingïakop ñiah thuk-thuk shabar ka Jylla bad dang shen u la wan ba ar ha ka jingïakop ñiah thuk-thuk kaba la tip kum ka MRF Mogrip Supercross FMSCI Championship kaba long ha ka 7 tarik u Kyllalyngkot 2026 ha Visakhapatnam ba la pynïaid da ka MRF Motorcross.
U la ong ba ka thong jong u ka long ban ïalehkai sha ki International Championship ruh.
