Shillong, Rymphang 13
Ka Indian Super League 2025-26 kan sdang ha ka sngi Saitjaiñ 14 Rymphang 2026 wat hadien ba don ki jingeh ïa ka jinglah ban pynlong ïa kane ka lympung ïalehkai ha ka jingartatien.
Ka lympung ïalehkai phutbol ba ha khlieh duh jong ka ri ka la pynkhreh ban sdang noh da ki jingïalehkai ba nyngkong eh ha katei ka sngi da ka jingïalehkai hapdeng ka lahduh ha ka lympung ba la dep ka Mohun Bagan Super Giant pyrshah ïa ka Kerala Blasters ka kynhun lehkai ba pynïaid, ar tylli ki klob kiba sngew sarong ïa ki nongkyrshan kiba bun tam ha ka phutbol India, ki ïakhun pyrshah ha ka jingïakhun kaba nyngkong ha Kolkata ha madan Vivekananda Yuba Bharati Krirangan ha ka por 5 baje janmiet.
Ka jingïakhun ba nyngkong jong ka NorthEast United kan long ha ka 16 tarik u Rymphang ha Kolkata pyrshah ïa ka East Bengal.
Ki 14 tylli ki klob jong ka ISL kin ïalehkai iwei ïa iwei pat ha ka rukom ‘single-leg round robin format’ ha ki 91 tylli ki jingïalehkai, ha kaba ka kynhun kaba kut da kaba ïoh bun poiñ tam kan ïohrah ïa ka nam lahduh. Baroh ki jingïalehkai yn pyni live lyngba ka ‘FanCode’ bad yn pyni ha ka ‘Sony Sports Ten 2’.
Ha kane ka jingïalehkai ba sdang jong ka kane aiom ïalehkai hapdeng ka Mohunbagan pyrshah ïa ka Kerala yn sa bud sa ka kynhun ïalehkai ba la jop ha ka AIFF Super Cup ka FC Goa ban sdang ïa ka jingïakhun pyrshah ïa ka Inter Kashi ha PJN Stadium ha Fatorda ha ka por 7:30 janmiet.
Ka Mohun Bagan ka don bynta kum ka kynhun ba la shah jied bha namar ba ka don ïa ka tynrai jong ka kynhun jop jong ka naduh u snem ba la dep kaba khlem shah pynkhyllem bad kan ïoh ïa ka jingmyntoi ban ïalehkai hakhmat ki nongkyrshan ba sngewtynnad jong ka ha la ïing kiba la khmih lynti ba kin don ha madan ha ka jingbun briew.
U Head Coach ka Mohun Bagan, u Sergio Lobera, haba kren ha katei ka sngi shuwa ka jingïalehkai, u la ong, “Ngi sngewkmen ban sdang ïa kane ka samoi namar ngi la ap khmih lynti la slem bha ïa kane ka khyllipmat, ngi donkam ban pynïaid beit ïa kane ka jinglong jingman bad ngi sngewkmen ïa kane ka lad ban ïakhun hakhmat ki nongkyrshan jong ngi ha madan ïalehkai jong ngi.
“Kan dei ka aiom kaba eh na ka bynta baroh, hynrei kaba khatduh, kane ka dei ka por ban pyrshang bad wad ki lad ki lynti ym ban ai daw”, u la ong.
Hynrei ka Kerala Blasters, kaba don ïa ki katto katne ki nongïalehkai ba kongsan, khamtam eh ïa ki nong India, ka la wanrah ruh ïa ki nongïalehkai ba tbit nabar ri ha ki kyrdan ba kongsan kum ka jingïada bad ka jingïalehkai tur sha khmat.
Haba kren hashwa ka jingïakhun, u Coach ka Kerala Blasters u David Català u la ong, “Ngin ïakhun pyrshah ïa ka kynhun ba tbit tam ha ka league lashai ka sngi. Ki don shibun ki nongïalehkai kiba tbit bad ngi sngewkmen shibun ban wan shane bad ban ïalehkai ïa ka jingïalehkai kaba sdang. Ka long kaba shisha ba ki dei ki nongjop ba dang ïakhun bad ka kynhun ba tbit tam ha ka ri hynrei ha ka phutbol baroh ki long kiba lah bad ym ju tip kaei ka ban jia. Ngi la pynleit jingmut bha ha ka jingïalehkai lashai bad ngin pyrshang ban ïoh ïa baroh lai tylli ki poiñ.”
