Shillong, Rymphang 13
U Satendra Singh Lohiya, uba dei u Para-Swimmer uba la 38 snem ka rta na Madhya Pradesh, ula thaw ïa ka histori, da kaba long u nongïalehkai ‘Para-Swimmer’ uba nyngkong na Asia, uba lah ban jngi lyngba ïa ka Cook Strait ha New Zealand. U la pyndep ïa ka jingjngai kaba 23.6 km ha ka por 9 kynta bad 22 minit, kaba pyni ïa ka jingkut jingmut bad ka mynsiem ïakhun jong u.
U Lohiya, u ba la ïoh ïa ka khusnam Padma Shri ha u snem 2024, u la jop ïa ki jingeh kiba khraw, kynthup ïa ka jingduna ha baroh ar tylli ki kjat ha ka por ba u dang rit namar ka jingbym biang ka jingsumar na ka bynta ka jingpang kpoh. U la sdang ïa ka jingleit jngi jong u ha ka ha u snem 2017 bad u la ïoh shibun ki khusnam, kynthup shibun ki khusnam ha ka ri hi baroh kawei: 4 tylli ki takma ksiar, 12 ki rupa, bad 7 ki takma rnong ha ki 11 tylli ki jingïakhun National Paralympic Swimming Championships. Kumjuh ruh ka takma ksiar ha ka 100m backstroke ha u snem 2022 jong ka lympung National Paralympic Swimming Championships bad ki jingjop ha ki jingïakhun ha ka kyrdan kylleng ka pyrthei ki long kawei ka takma ksiar, 2 ki takma rupa, bad kawei ka takma rnong ha ki 3 tylli ki jingïakop jngi International Paralympic Swimming Championships, u la lah ruh ban jngi lyngba ka duriaw English Channel ha u snem 2018 ryngkat bad ka kynhun ïalehkai para jngi jong ka ri India.
Ki khusnam ba u la ïohpdiang ki long ka Padma Shri (2024), ka khusnam Tenzing Norgay National Adventure Award bad ka Khusnam Vikram (2014).
U Myntri Rangbah ka Madhya Pradesh, u Mohan Yadav, u la ïaroh ïa kane ka jingjop jong u Lohiya, da kaba ong ba ka dei ka por kaba sngew sarong ïa ka jaidbynriew bad ka Jylla, kaba pynpaw ïa ka jingkut jingmut bym lah pynkhih bad ka mynsiem bym lah ban ïakhun jong u.
