Shillong, Rymphang 13
Ka Assam Rifles Sentinels Cup ha ka sien kaba saw kan long biang naduh ka 17 haduh ka 27 tarik u Rymphang ha Shillong.
Kane ka lympung ïalehkai kaba la ai kyrteng katkum ka kyrteng jong ka Assam Rifles, ‘Sentinels of the North East’, la ïohi ïa kiba bun ki kynhun na kylleng ka thaiñ Shatei Lammihngi ban ïakhun pyrshah na ka bynta ka burom ban ïoh khur ïa ka khusnam.
Ha kane ka lympung ïalehkai ‘Sentinels Cup’ yn ïohi ïa ka jingwan ïashim bynta kaba bun na ki klob kiba wan na ka Jylla Meghalaya, kumjuh ruh ki kynhun shipai Assam Rifles, ka Indian Army bad ki pulit Meghalaya. Ha kane ka lympung yn don 8 tylli ki kynhun kawei-kawei ha ka kyrdan jong ki shynrang bad kynthei ki ban ïakhun lyngba ki ‘group stages’, bud sa ki ‘knockout round’.
Ka jingplie paidbah la buh ban long kadei ha ka 17 tarik u Rymphang ha madan First Ground, Polo, naduh ka por 2 baje nohphai sngi, bad ïa ka phainal ruh la pynbeit ba kan long ha kane ka juh ka madan hadien shiphew sngi bad ki nongjop jong kane ka lympung kin ïoh khur ïa ka song pisa kaba T.3 lak.
Ka Assam Rifles ka ïohi ba kane ka lympung ka long kaba ïahap bad ka thong jong ka ban kyntiew ïa ki kam ïalehkai, ban pynïasoh ïa ki samla ka thaiñ Shatei Lam Mihngi bad ban pynshlur ïa ki ban kiar na ki kam lehnoh bad ki jingdih buaid.
Ka Assam Rifles ka thmu ban pynroi ïa ki sap ïalehkai phutbol lyngba ka jingïateh kular jong ka bad ka Bhaichung Bhutia Football Academy bad ka Assam Rifles Public School (Sports), kaba trei shitom ban sei bad kyntiew ïa ka sap jong ki samla ïalehkai phutbol jong kane ka thaiñ. Ka jingïatreilang jong kane ka lympung bad ka Khelo India Abhiyan bad ka Fit India Movement ka pynkhlaiñ tang ïa ka bynta jong ka kum ka nongpynkylla ïa ka jingkylla kaba bha ha kane ka thaiñ.
