Shillong, Rymphang 15
Ka Royal CC ka la pynliem noh ïa ka Lumpyngngad SSCC da 229 run na ka bynta ban khur ïa ka jingjop ha ka lympung ïalehkai Super Division Cricket League 2026 ba la pynlong da ka Shillong Cricket Association ha ka sngi U Blei.
Ha kane ka jingïakhun kaba ka long ha madan jong ka MCA kaba ha Polo, ka Royal ka la kam trai ba kan tied nyngkong ha kaba ka la kamai 241 run bad shah pynkhyllem 8 wiket ha ki 45 over. U Swastic Chettri u la long u nongtied uba kynsai ha kaba u la lah ban kamai 81 run na ki 90 bol bad u Tarique Anwar Siddique u la ïoh 76 run na ki 75 bol. Katba u Mukesh Kumar Rai u la khur 3 wiket bad ïa ki 2 wiket la ïoh da u Vishal Kumar Balmiki.
Haba wan beh ïa ka thong ki nongtied ka Lumpyngngad ki la shah pynkhyllem baroh bad kamai tang 112 run ha ki 23.1 over. U Samir Shah u la tied 32 run na ki 30 bol bad u Shomraj Paul u la ïoh 26 run na ki 15 bol. Katba u Bipin Ray lem bad u Raj Biswa ki la khur mar 3 wiket. Ïa ka nam Player of the Match la ïoh ban khur da u Raj Biswa, uba la tied 30 run bad shim 3 wiket.
Ka jingïalehkai ha ka sngi U Blei kan long hapdeng ka Nongthymmai CC pyrshah ïa ka Langsning CC naduh ka por 8:30 mynstep.
