Shillong, Rymphang 15
Ka Jamshedpur FC ka la khur ïa ka jingjop kaba nyngkong ha ka lympung ïalehkai Indian Super League, hadien ba ka la pynliem noh ïa ka Mohammedan SC da 1-0 kol ha ka sngi U Blei ha JRD Tata Sports Complex.
Ka nam jop jong kane ka kynhun hapoh ka jingïalam u Owen Coyle ka la wan urlong lyngba ka shi kol ba la thep da u Madih Talal ha ka minit kaba 9.
Haba phai sha kawei pat ka jingïakhun kaba ar, ka Bengaluru ka la pynliem noh ïa ka Sporting Delhi da 2-0 kol.
Kane ka jingjop jong ka BFC ka la wan urlong lyngba u Sivasakthi Narayanan hashwa ban kut ka kylla step kata ha ka minit kaba 45+1 lem bad kawei pat ba la thep da u Sunil Chhetri (90+4) na ka bynta ban khur ïa ki lai poiñ.
Ha kawei pat ka liang ka NorthEast United FC kan pynkhreh ïa ka jingïalehkai kaba nyngkong pyrshah ïa ka East Bengal ha ka lah sngi U Blei ha Salt Lake Stadium kaba ha Kolkata ha ka por 7:30 janmiet.
Kane ka kynhun hapoh ka jingïalam u Juan Pedro Benali (coach) kaba la wan ha ka kyrdan balai ha ka aïom ba la lah, ka la kut noh ka jingïaid lynti hadien ka jingshah rem ha ka jingï alehkai ‘playoff’ ha ka Jamshedpur FC. Hynrei kane ka kynhun ka la lah ban khur ïa ka nam lahduh ha ka Durand Cup hadien ba ka la lah ban pynliem noh ïa ka Diamond Harbour da 6-1 kol ha ka jingïakhun phainal.
Ha kane ka kynti kaba mynta ka NEUFC ka la duh noh ïa u rangïalehkai ba kynsai uba la ïohpdiang ïa ka nam Golden Boot u Alaeddine Ajaraie, uba la leit ïasoh (loan) noh sha ka klob kaba na Indonesia ka Persija Jakarta na ka bynta ka aïom ïalehkai 2025-26.
Ki rangïalehkai ka NorthEast United na ka bynta kane ka aïom ïalehkai ki long
Goalkeeper: Gurmeet Singh, Dipesh Chauhan & Arman Tamang
Defender: Dinesh Singh Soraisham, Tondonba Singh Ngasepam, Míchel Zabaco, Asheer Akhtar, Robin Yadav & Buanthanglun Samte
Midfielder: Mayakkannan, Macarton Nickson, Andy Rodríguez, Thoi Singh Huidrom, Redeem Tlang, Bekey Oram, Mohammed Arshaf & Danny Meitei Laishram
Forward: Jairo Samperio, Guillermo Fernández, Parthib Gogoi, Ankith Padmanabhan, Lalrinzuala Lalbiaknia, Lalbiakdika Vanlalvunga, Fredy Chawngthansanga & Jithin MS.
