Shillong, Rymphang 15
Ka India ka la pynliem noh ïa ka Pakistan da 61 run na ka bynta ban khur ïa ka jingjop kaba lai ha ka T20 World Cup kaba la long ha ka sngi U Blei ha R. Premadasa Interna -tional Cricket Stadium, Colombo, Sri Lanka bad ka la rung sha ka ‘Super 8’.
Kane ka nam jop ka la wan lyng-ba ka jingïalehkai bha u Ishan Kishan uba la khur ïa ka shiteng spah run lem bad ka jinglah ban pynhap wiket kloi da ki nong-kawang bol ha ka pali kaba ar bad ban pynlong ïa ka India ban lam-khmat ha ka Group-A.
Haba wan beh ïa ka thong kaba 176, ka Pakistan kam shym la lah satia ban ïakhun namar ka jingtbit ki nongkawang bol jong ka India. Shwa ïa kane, u Ishan Kishan u la lah ban kamai 77 run na ki 40 bol (10x4s & 3x6s). U Kishan u la ïatreilang ryngkat bad u Tilak Varma, uba la ïoh 25 ron na ki 24 bol, katba u kapten u Suryakumar Yadav u la ïoh 32 ron ban ïarap ïa ka India ban kynjoh sha ki 175 run bad shah pynhap 7 wiket.
Haba wan beh ïa ka thong ka Pakistan ka la sdang ban kulmar jingmut hadien ba u Hardik Pandya u la lah ban pynkhyllem noh ïa u Sahibzada Farhan ha ka over ba nyngkong. Nangta u Jasprit Bumrah u la pynhap ïa u Saim Ayub bad u kapten u Salman Agha bad ban pynlong ïa ka Pakistan kamai ha ka 13 run ha ki 2 over.
U Usman Khan u la pyrshang ban ïakhun tyngeh da kaba u la kamai 44 bad u la ïatreilang bad u Babar Azam lem bad u Shadab Khan. Hynrei ka jingïalehkai bha ki nongkawang bol ka India ka la pynlong ïa ka Pakistan ba kan ym lah ban leh eiei haduh kaba kut ha kaba ka la shah pynkhyllem baroh ki nongtied bad ban kamai tang 114 run ha ki 18 over.
Ka India kan pynkhreh ïa ka jingïakhun kaba saw pyrshah ïa ka Netherlands ha ka 18 tarik.
