Shillong, Rymphang 15
Ka Meghalaya Cage Fight (MCF) kan pynïaid ïa ka lympung ïakura Fight Night ne ka ‘Thma ha Jowai’ ha ka 6 tarik u Lber ha Chuwakhu Indore Hall Jowai.
Haba kren sha ki lad pathai khubor ha Shillong Press Club, u Bah Samual Lyngdoh, President ka Meghalaya Cage Fight ula ong ba ha kane ka lympung ïalehkai ki don haduh 10 ngut ki nongïakhun na ka Jylla bad kiba na ki jylla na thaiñ shatei lammihngi kum na Arunachal Pradesh bad Madhya Pradesh.
U la ïathuh ba u rangïalehkai na ka Jylla u samla Ronal Khyriem un ïakhun pyrshah ïa u rangïalehai na Assam.
Shuh shuh u la pynbna ba yn sa die ïa ki tiket ha katei kajuh hi ka sngi ha kador T. 500 bad T. 1000 tyngka.
Kumta na ka liang ka KMCF ka la khot wer ïa ki paidbah ka Jylla kiba ju ïeid bad smat ban peit ki jingïalehkai khamtam ha ki jingïakura jong ka UFC kin wan ban sakhi bad ai ka jingkyrshan ha katei ka rynsan ïalehkai.
