Shillong, Rymphang 16
Ka Langsning CC ka la khur ïa ka jingjop ha ka lympung ïalehkai Super Division Cricket League 2026 ba la pynlong da ka Shillong Cricket Association, hadien ba ka la lah ban pynliem noh ïa ka Nongthymmai CC da 56 run ha ka lah sngi U Blei ha madan ïalehkai kriket jong ka MCA ha Polo.
Ha kane ka jingïakhun ka Langsning kaba la jop ïa ka kynting pisa ha kaba ka la shimti ban tied nyngkong bad kamai 272 run bad shah pynkhyllem noh 6 wiket ha ki 45 over. U Nishanta Chakraborty u la lah ban pynpaw ïa ka jingtbit kum u nongtied ha kaba u la ïoh ban khyrwit ïa ka spah run kaba 117 na ki 82 bol bad u Riboklang Hynñiewta u la ïoh ïa ka shiteng spah kaba 55 run na ki 61 bol. Katba u Badonamjohn Mylliemngap bad u Ram Najiar ki la khur mar 2 wiket na ka bynta ka Nongthymmai.
Haba wan beh ïa ka thong, ka Nongthymmai ka la kamai tang 216 run bad shah pynhap 9 wiket ha ki 45 over. U Sandeep Chanda u la khyrwit ïa ka shiteng spah kaba 64 run na ki 100 bol ryngkat bad u Anmol Sunar, uba la ïoh 55 run na ki 65 bol. Katba u Riboklang Hynñiewta u la khur 3 wiket bad ïa ki 2 wiket la ïoh da u Aaron A. Nongrum na ka byntsa ka Langsning. Te kumta u Nishanta Chakraborty uba la lah ban kamai 117 run, ula ïohpdiang ïa ka nam Player of the Match.
Ka jingïalehkai ha ka sngi Ba-ar kan long hapdeng ka Sputnik Spartans pyrshah ïa ka Sporting CC naduh ka por 8:30 mynstep.
