Shillong, Rymphang 16
Ka Shillong Lajong FC kan sdang ïa ka jingïalehkai kaba nyngkong ha la ïing ha ka lympung ïalehkai Indian Football League (IFL) pyrshah ïa ka Rajasthan United FC ha ka 1 tarik u Lber.
Kane ka la wan hadien ba ka All India Football Federation (AIFF) ka la pyllait ïa ka prokram ïalehkai kaba don shiphew tylli ki kynhun ïalehkai na kylleng jong ka ri. Te kumta ka Shillong Lajong kan pynkhreh ïa saw tylli ki jingïalehkai ha la ïing ha ka wat kaba nyngkong lem bad san tylli ki jingïalehkai shabar na ïing.
Dangshen ha ka taïew ba la lah ka AIFF ka la pynbna ba ïa ka I-League la pynkylla kyrteng thymmai sha ka Indian Football League na ka bynta ban wanrah ka jingkylla ha ka rukom ïalehkai phutbol hapoh ka ri.
Nalor ka Rajasthan United, ka SLFC kan pynkhreh ïa kiwei pat ki jingïalehkai ha la ïing pyrshah ïa ka Real Kashmir ha ka 8 tarik, kumjuh ïa ka Diamond Harbour ha ka 14 tarik bad ïa ka Aizawl FC ha ka 18 tarik u Ïaïong.
Kiwei pat ki san tylli ki jingïalehkai ka SLFC shabar na la ïing ki long pyrshah ïa ka Chammari FC ha ka 19 tarik u Lber ha Aizawl, ïa ka Gokulam Kerala ha ka 26 tarik ha Calicut, ïa ka Sreenidi Deccan ha ka 1 tarik u Ïaïong ha Hyderabad Telangana, ïa ka Dempo SC ha ka 7 tarik ha Goa bad ïa ka Namdhari FC ha ka 10 tarik ha Ludhiana, Punjab.
Lah ban kdew ba ïa ka jingïalehkai phutbol jong ka ri India la tip nyngkong kum ka National Football League (NFL) naduh u snem 1996 haduh u snem 2007, shwa ban pynkylla kyrteng biang ïa ka kum ka I-League. Hynrei ka jingpynlong ïa ka Indian Super League ha u snem 2014 ka la pynkylla dur thymmai ïa ka rukom ïalehkai hapoh ka ri, kaba la pynlong ïa ka I-League ban rung sha ka kyrdan kaba ar.
Te kumta kane ka samoi ïalehkai kan sdang naduh 21 tarik mynta u bnai ha kaba yn shim bynta da 10 tylli ki kynhun kiba kynthup ïa ka Diamond Harbour, Real Kashmir, Gokulam Kerala, Rajasthan United, Dempo SC, Namdhari FC, Shillong Lajong bad ka Sreenidi Chanmarizal Deccan, Aizawl FC bad ka Chanmari FC.
Ha kawei pat ka liang, ka Executive Committee jong ka AIFF ka la kyntait noh ïa ka jingkyrpad ka Churchill Brothers ban shah kynthup ha ka ISL 2025-26. Ha ka jingshisha katei ka kynhun kaba na Goa ka la long ka lahduh ha ka I-League jong ka aïom ba la lah bad ka la kiew kyrdan sha ka ISL. Hynrei hadien na ka liang ka Court of Arbitration for Sport (CAS) ka la rai pynksan ïa ka Inter Kashi kum ka lahduh.
Te kumta katei ka klob kaba na Varanasi ka la kiew kyrdan sha ka ISL. Te kumta na ka liang ka Churchill Brothers ka la ujor sha ka ïingbishar jong ka Delhi High Court halor katei ka rai jong ka AIFF bad haduh mynta katei ka kam ka dangsah teng.
