Shillong, Rymphang 16
2 ngut ki rangïalehkai ka Jylla u Rishanskhem P. Lipon bad u Damangpura L. Mawlong ki la wanrah burom ïa ka ri India da kaba khur ïa ki takma rnong ha ka 6th Khun Khmer World Championship 2025 kaba la long ha Shanoukville, Cambodia.
Ha katei ka lympung ïalehkai kaba la sdang naduh 10 haduh 13 tarik mynta u bnai, u Rishanskhem u la khur ïa katei ka takma ha ka kyrdan ïalehkai jong ka 57kg Semi Pro Senior Men bad u Damangpura u dei u rangïalehkai uba shong basah ha Mairang, u la khur ïa katei ka takma ha ka kyrdan ïalehkai jong ka 60kg Amatuer Senior Men.
Kumba ka paw kine ki ar ngut ki la long tang ma ki napoh ka jylla Meghalaya ban mihkhmat ïa ka ri India hapoh ka lama jong ka KIF Khun Khmer Federation- India ha ka jingïalam u Vengatachalam Sarona Mahalingam bad u Thomas Rangthaluh uba na Umling Nongpoh, Ribhoi District.
Lah ban kdew ba u Rishanskhem uba shong basah ha Nongmynsong Umkdait bad uba dangpule ha St. Anthony Higher Secondary School, Laitumkhrah Shillong, u la shah hikai hapoh ka shlem ai jinghikai jong ka Tribal Combat Academy kaba ha Madanryting, Shillong bad la ai jinghikai ïa u da u Coach u Babit Kharsahnoh, uba long uwei na ki khlur ïalehkai ba paw ha ka Muaythai bad Kickboxing.
