Shillong, Rymphang 16
U Will Jacks u la lah ban pynpaw ïa ka jingtbit na ka bynta ban pynlong ïa ka kynhun ïalehkai ka England ban pynliem noh ïa ka Italy da 24 ron bad ban rung sha ka Super Eights jong ka ICC Men’s T20 World Cup, ha ka jingïalehkai jong ka Group-C kaba la long ha ka lah sngi U Blei ha Eden Gardens.
Haba shimti ban tied nyngkong, ka England ka la tied palat 200 run ha ka sien kaba nyngkong ha kane ka jingïakhun, da kaba ka la lah ban kamai 202 run bad shah pynkhyllem 7 wiket. Ha kane ka jingïalehkai ba la lamkhmat da u Jacks, uba la long u nongtied uba khlem shah pynkhyllem u la lah ban tied 53 run na ki 22 bol, kynthup ïa saw tylli ki ‘six’ lem bad lai tylli ki ‘four’. Kane ka jinglah ban ïalehkai bha ka jong u ka la pynlong ïa ka England ban kynjoh sha ki 105 run hadien 5 wiket. U Sam Curran u la noh synñiang da kaba kamai 25 run na ki 19 bol bad ha ka jingïatrei lang ki la kynjoh sha ki 54 ron na ki 25 bol na ka bynta ka wiket kaba hynriew.
Kham mynshwa, u Phil Salt u la pyni ïa ka mynsiem ïakhun da kaba u la tied 28 run na ki 15 bol, kaba la ïarap ïa ka England ban tam 50 run hapoh 5 over. Hynrei, ka jingïalehkai ka la sdang hiar hadien ba u Jos Buttler u la shah pynkhyllem noh hadien ba u la ïoh tang 3 run ha u Grant Stewart. Hadien kane u Salt u la shah pynkhyllem noh ha u Ali Hasan, katba u Jacob Bethell (23 run na ki 20 bol) bad u Harry Brook (14 run na ki 9 bol) ruh kim shym la lah satia ban ïalehkai bha ha kaba sdang. U Tom Banton u la noh synñiang da kaba u la tied 30 na ka 21 bol shwa ba un shah pynhap noh ha u Manenti.
Haba wan beh ïa ka thong ka Italy ka la sdang ha ka rukom kaba phylla ha kaba u Jofra Archer u la lah ban pynhap wiket (1/2), bad hadien ka la ïoh tang 22 run ha ki 3 wiket.
U Anthony Mosca u la shah pynhap wiket tang mar ïasdang lem bad u J. J. Smuts, ha kaba la bud sa u Harry Manenti bad kane ka la buh jingeh ïa ka Italy. Hynrei u Ben Manenti ula lah ban ïalehkai bha bad u la khyrwit ïa ka shiteng spah kaba 60 run na ki 25 bol. Ha kaba kut ka Italy ka la shah pynkhyllem baroh ki nongtied bad ban kamai tang 178 run ha ki 20 over bad ka England ka la jam sha ka Super Eights na katei ka group.
