Shillong, Rymphang 17
Ka kynhun ki ‘thei ïalehkai Assam Rifles F.T ka la khur ïa ka jingjop ha kaba sdang ïa ka lympung ïalehkai 4th Assam Rifles Sentinels Cup 2026 ha ka sngi Ba-ar, hadien ba ka la lah ban pynliem noh ïa ka Laitkor SC da 5-0 kol ha SSA Stadium kaba ha Polo.
Ka Samati Kumari bad ka N. Roni Devi ki la thep mar ar kol bad ïa kawei pat la pynbud da ka Santosh.
Ïa kane ka lympung la plie da u Major General Jai Singh Bainsla, SM ha kaba la don lang ki heh ophisar katei ka kynhun shipai, ki khynnah skul bad kiwei kiwei. Ki la don phra tylli ki kynhun jong ki shynrang bad kynthei kiba na kane ka nongbah kynthup lang ïa ka kynhun shipai, kumjuh na ka Shillong Police kiba la wan shim bynta ha kane ka lympung kaba la ju pynlong manla u snem ha kane ka nongbah.
Nalor ka Assam Rifles bad ka Laitkor, kiwei pat ki kynhun ïalehkai jong ki kynthei ki long ka Little Star Academy, Lawei SC (Smit), Mawshbuit SC, Kharang SC, PFR Football Academy bad ka Rangdajied United FC. Ha ka liang ki shynrang ki long ka Assam Rifles, Shillong Police, 164 T.A, Smit SC, Laitkor SC, Little Star Academy, Nongkrem SC bad ka Thynroit SC.
Ïa ki jingïalehkai ki ban bteng naduh ka sngi Balang haduh ka Semi Final yn pynlong ha madan Nongkrem bad ha madan jong ka Assam Rifles kaba ha Laitkor.
Te kumta ka jingïalehkai jong ki kynthei kan bteng biang ha ka sngi Balang ha kaba ka PFR pyrshah ïa ka Mawshbuit ha ka por 10 baje mynstep bad ka Little Star Academy ïa ka Lawei SC ha ka por 2 baje nohphai sngi bad kine kin long ha madan Nongkrem. Katba ka jingïakhun jong ki shynrang kan long hapdeng ka Assam Rifles pyrshah ïa ka 164 TA ha ka por 10 baje mynstep bad ka Laitkor ïa ka Nongkrem ha ka por 2 baje nohphai sngi bad kine ki jingïakhun ki long ha madan jong ka Assam Rifles.
Ïa kane ka lympung yn pynkut ha ka 27 tarik mynta u bnai ha kaba ki kynhun ki ban khur nam lahduh ha ka liang ki shynrang bad kynthei kin ïohpdiang ïa ka khusnam pisa kaba mar T. 3 lak tyngka, katba kiba wan ba-ar kin ïoh mar T. 2 lak tyngka.
