Shillong, Rymphang 18
Ka Nongmynsong CC ka la khur jingjop ha ka Super Division Cricket League 2026 ba la pynlong da ka Shillong Cricket Association (SCA), hadien ba ka la pynliem noh ïa ka Lumpyngngad CC da 8 wiket ha ka sngi Balang.
Ha kane ka jingïakhun ka Nongmynsong ka la jop ïa ka kynting pisa, ka la ailad ïa ka Lumpyngngad ba kan tied nyngkong ha kaba ka la shah pynkhyllem baroh ki nongtied bad ban kamai tang 87 run ha ki 16.5 over. U Rahul Shah u la tied 16 run na ki 11 bol bad u Rajib Ray u la ïoh 16 run na ki 23 bol. Katba u Santosh PM u la khur 3 wiket bad ïa ki 2 wiket la ïoh da u Bibek Poudel na ka bynta ka Nongmynsong.
Haba wan shimti ïa ka pali kaba ar, ka Nongmynsong ka la lah ban kynjoh da kaba suk sha ka thong da kaba kamai 91 run bad shah pynhap 2 wiket ha ki 14.4 over. U Jaskirat S Sachdeva u la tied 30 run na ki 28 bol bad u Pushkar Raj Singh u la ïoh 23 run na ki 24 bol. Katba u Rahul Shah u la khur 2 wiket na ka bynta ka Lumpyngngad. Ïa ka nam Player of the Match la khur da u Santosh uba la tied 8 run bad pynhap 3 wiket.
