Shillong, Rymphang 18
Ka India ka la pynliem noh ïa ka Netherlands da 17 run bad ka la ïoh ban lamkhmat ha ka lympung ïalehkai ICC T20 World Cup ha ka sngi Balang ha Narendra Modi Stadium kaba ha Ahmedabad.
Kane ka la wan lyngba ka jingïalehkai bha u Shivam Dube uba la ïoh ban khyrwit ïa ka shiteng spah na ka bynta ban pynlong ïa ka India ban buh ïa ka thong da kaba kamai 193 run bad shah pynhap 6 wiket ha ki 20 over ha ka jingïakhun kaba khatduh jong ka Group-A.
Kumba ka paw ka India ka la dep ban pynthikna ban rung sha ka Super Eight naduh ba ka la jop ïa ka Pakistan ha ka sngi U Blei, katba ka Pakistan ka la lah ban pynthikna kum ka kynhun kaba ar na kane ka group ban jam sha kawei pat ka kyrdan hadien ba ka la jop ïa ka Namibia da 102 run ha ka sngi Balang.
U Shivam u la long u nongtied uba kynsai ha kaba u la khyrwit 66 run na ki 31 bol, kynthup saw tylli ki ‘four’ lem bad hynriew tylli ki ‘six’. Katba u kapten ka kynhun u Suryakumar Yadav u la tied 34 run na ki 28 bol, kynthup ïa ar tylli ki ‘four’ bad kawei ka ‘six’.
Hynrei haba wan shimti ïa ka pali kaba ar, ka Netherlands ka la shem jingeh ban ïalehkai bha na ka daw ka jingtbit ki nongkawang bol ka India ha kaba u Varun Chakaravarthy uba la khur 3 wiket. Te kumta ha kaba kut ka Netherlands kam shym la lah ban kynjoh sha ka thong bad kamai tang 176 run bad shah pynhap 7 wiket.
Ha kane ka lympung ïalehkai kaba don 20 tylli ki kynhun kiba ïashim bynta, tang mar ar tylli ki kynhun kiba wan ha ki kyrdan ba hakhlieh ha kawei pa kawei ka group kiba la ïoh rung sha ka wat jingïakhun jong ka Super 8 ha kaba mynta ki la don sa tang phra tylli ki ban ïakhun pyrshah na ka bynta ban khur ïa ka jingjop.
Ka West Indies kaba la bat ar sien ïa ka nam lahduh, ka la long kaba nyngkong eh ban jam sha kitei ka wat jingïakhun, hadien ba ka la jop da 9 wiket ïa ka Nepal na ka bynta ban bat ïa ka kyrdan ba hakhlieh ha ka Group-C.
Ka India kaba long ka lahduh jong ka aïom ba la lah, ka la lah ban pynthikna nyngkong na ka Group-A hadien ba ka la jop da 61 run ïa ka Pakistan.
Na ka Group-D, ka South Africa kaba la rung final ha ka aïom ba la lah, ka la ïasoh lang ryngkat bad ka New Zealand ban rung sha ka Super 8.
Ka England kaba la bat ar sien ïa ka nam lahduh, ka la long ka kynhun kaba ar na ka Group-C ban jam sha kawei pat ka wat jingïakhun hadien ba ka la jop da 24-run ïa ka Italy ha ka jingïalehkai kaba khatduh.
Ka Sri Lanka kaba long ka nongïoh pynlong lang ïa kane ka lympung, ka la jam sha ka Super Eight na ka Group-B hadien ba ka la lah ban pynliem ïa ka Australia, kaba la bat teng ïa ka nam lahduh.
Kumjuh ruh ka Zimbabwe ka la long kaba ar na ka Group-B ban ïoh rung sha kawei pat ka wat jingïakhun pyrshah Ireland na ka daw ka jingshah pynthud ha u slap bad dei hangne ba ka la pynkut syndon ïa ka jingïaid lynti ka Australia.
Te kumta ha ka Super 8 la phiah ïa ki phra tylli ki kynhun ha ki ar group ki ban ïakhun pyrshah. Ha ka Group 1 ki long ka India, West Indies, South Africa bad ka Zimbabwe. Katba ha ka Group 2 ki long ka Pakistan, Sri Lanka, England bad ka New Zealand.
