Jowai, Lber 03
Ka Lion Y&SA ka la jop suk da 128 run ïa ka Khliehtyrshi SC ha ka lympung ïalehkai District Cricket League 2026 ba la pynïaid da ka West Jaiñtia Hills District Cricket Association ha ka sngi Ba-ar ha madan ïalehkai Khliehtyrshi.
Ha kane ka jingïaleh-kai ka Lion Y&SA ka la kam trai ban tied nyngkong ha kaba ka la kamai 211 run ha ki 35 over bad shah pynhap 8 wiket. U Nick Dann ula long u nongtied ba kynsai ha kaba u la tied 69 run na ki 47 bol kynthup ïa 3 tylli ki ‘six’ bad 5 tylli ki ‘four’, katba u Dr Dawanroy Nongpluh ula ïoh 32 run na ki 60 bol kynthup 4 tylli ki ‘four’. Na ka liang u nongkawang bol jong ka Khliehtyrchi, u Peter Nongtdu ula khur 4 wiket na ki 7 over.
Haba wan beh ïa ka thong, ka Khliehtyrchi ka la shah pynhap baroh ki nongtied tang ha ki 24.4 over bad kamai tang 83 run. U Yutang Kma ula tied 28 run na ki 26 bol kynthup 4 tylli ki ‘four’. Katba u Daymen Shullai ula khur 4 wiket na ka bynta ki 11 run ha ki 4 over, katba u Peterson Lamare bad u Noonday-star Pohrmen ki la khur mar 2 wiket. Ïa ka nam Man of the Match la ïoh da u Nick Dan jong ka Lion.
Ka jingïalehkai ha ka sngi Balang kan long hapdeng ka Riwar Titan CC bad ka Tympang CC ha ka por 9 baje mynstep.
