Shillong, Lber 04
Ka kynhun ïalehkai jong ki kynthei ka India ka la sdang ïa ka jingïakhun jong ka ha ka 2026 AFC Women’s Asian Cup da ka jingïalehkai ba sdang pyrshah ïa ka Vietnam ha Perth, Australia ha ka sngi Balang ka 04 Lber 2026.
Hadien 23 snem, ka India ka la leit ban aireng biang, hynrei kaba sngewsih ka long ba ka la shah rem noh ha ka Vietnam da 1-2 kol.
Ha ka kylla kaba nyngkong (first half), ka Vietnam ka la kham khlain bad synshar ïa ka jingïalehkai ha madan, bad ki la ïoh ban pynkhih ïa ka jar ba nyngkong ban pynlong ïa ka ‘score’ da 1-0 kol.
Ka nam kaba pynsngew sarong pat ïa ka India ha ka kylla kaba ar (second half), ka India ka la pynkylla ïa ka jingïalehkai ha kaba ka Sanfida Nongrum, ka thei ïalehkai na ka jylla Meghalaya, ka la ïoh ban pynkhih ïa ka jar ha ka minit kaba 51 ban pynïakhaid da ka 1-1 kol. Kane ka dei ka sien kaba nyngkong ba ka thei ïalehkai na Meghalaya kan ïoh thep kol ha kum kane ka lympung bah.
Katba ka por ka la jan kut, ha ka minit kaba 94 ka nongïalehkai ka Vietnam, ka Thi Van Su, ka la ïoh ban thep biang sa shi kol ban pynïoh noh da 2-1 kol ïa ka kynhun bad knieh noh ïa ka jingjop na ka kti ka India.
Ha ka jingïalehkai ka ban wan, ka India kan sa aireng biang pyrshah ïa ka ri Japan (kaba ju long ka lah-duh ka pyrthei) ha ka 7 tarik u Lber 2026.
