Shillong, Lber 12
Ka hat-trick ba la khur da u Federico Valverde ka la biang pura ïa ka Real Madrid ban pynliem ïa ka Manchester City da 3-0 kol ha ka pre-quarter final ka wat ba nyngkong jong ka Champions League, katba ka Paris Saint-Germain ka la jop da 5-2 kol ïa ka Chelsea.
Ka Arsenal kaba danglam-khmat ha ka Premier League ka la ïakhaid mar 1-1 kol ha ka jingïakhun pyrshah ïa ka Bayer Leverkusen na ka bynta ban long ka kynhun kaba khlem pat shah rem ha kane ka lympung mynta ka aïom, katba ka Bodo/Glimt ka la jop da 3-0 kol ïa ka Sporting.
Katei ka kynhun jong u Alvaro Arbeloa kaba la bat 15 sien ïa ka nam lahduh ha Europe, ka la kput kylla ïa ka jingshah rem ha ka City ha ka ‘league’ ha kaba u Valverde u la ïoh ban thep ïa kitei ki kol ha ka kylla step ha ka minit kaba 20, 27 & 42 watla ka Madrid ka la duh ïa u Kylian Mbappe, uba dangdon ha ka jingmynsaw.
“Ka long kaba phylla ban pynurlong ïa kane ka jingjop. Ka la long ka jingïaid lynti kaba jngai haduh ba ngan ïoh ban lehkmen, ” la ong u Valverde hadien ba la kut ka jingïalehkai.
“Nga la don ka jingsngew ba ngi kham bha ban ïa kiwei, hynrei kane ka jingmih ka la pynkylla khongpong,” ong u manager ka City u Pep Guardiola bad um shym la lah ban ong eiei la ka kynhun ka dangdon jingkyrmen ne em ha ka wat kaba ar ka ban long ha ka taïew ka ban wan.
Ka PSG ka dangsah sa shisien ïakhun na ka bynta ban pynthikna ban jam sha ka quarter-final hadien ba ki ar tylli ki kol ba la thep hashwa ban wai da u Khvicha Kvaratskhelia ha Parc des Princes.
Tang mar ïasdang u Bradley Barcola (10) u la pynkhih jar nyngkong na ka bynta ka PSG hashwa ba u Malo Gusto un pynphai kylla na ka bynta ka Chelsea. Ka PSG ka la lah ban tam da 2-1 kol hadien ba u Ousmane Dembele u la ïoh ban thep ha ka minit kaba 40.
Hadien katto katne por u Enzo Fernandez (57) u la lah ban pynïakhaid biang na ka bynta ka Chelsea hadien ka jingïarap lang u Pedro Neto.
Ka jingbakla u Filip Jorgensen ka la pynlong ïa u Vitinha ban thep kol ha kaba u rangapkol ka Chelsea um shym la lah ban khanglad ïa ka PSG na ka bynta ban thep ïa ka kol kaba lai. Hashwa ban wai u Kvaratskhelia u la ïoh ban thep ar kol na ka bynta ban pynlong ïa ka kynhun jong u Luis Enrique ban khur syndon ïa ka jingjop.
“Ka long ka por kaba kyrpang namar ngi la lah ban pynurlong ïa ka jingangnud,” la ong u Luis Enrique.
Kumjuh ka Arsenal ka la donkam haduh kaba minit kaba 89 ba kan pynphai kylla lyngba ka penalty da u Kai Havertz na ka bynta ban pynïakhaid mar 1-1 kol pyrshah ïa ka Bayer Leverkusen.
Watla kine ki kynhun kim shym la lah ban thep kol ha ka kylla step, hynrei u Robert Andrich u la ïoh ban pynkhih jar nyngkong ha ka minit kaba 46 na ka bynta ka Leverkusen. Hynrei u Havertz u la mih na kaba shongben bad u la lah ban pynurlong lyngba ka penalty bad ban pynïoh jingkyrmen ïa ka Arsenal ban jam sha ka quarter-finals.
Haba phai sha kawei pat ka jingïalehkai, ka Bodo/Glimt ka la don jingkyrmen ban jam sha ka quarter final ha ka Champions League hadien ba ka la lah ban pynliem ïa ka kynhun kaba na Portugal ka Sporting da 3-0 kol. Kane ka la wan urlong lyngba ka penalty ba la thep da u Sondre Brunstad Fet, kumjuh u Ole Didrik Blomberg bad kawei pat da u Kasper Hogh.
