Shillong, Lber 31
Ka Jylla ka la khur biang sa kawei ka takma rnong kaba saw ha ka lympung ïalehkai 1ST Khelo India Tribal Games 2026 kaba dangïaid mynta ha Jagdalpur, Chhattisgarh.
Kane ka la wan lyngba ka ‘thei ïalehkai athletics, ka Melibad Kro kaba la khur ïa ka takma rnong ha ka jingïalehkai Shot Put hadien ba ka la lah ban kawang ha ka jingjngai kaba 9.43 mitar, ha ka sngi Ba-ar.
Kane ka ‘thei ïalehkai kaba na Ri Bhoi District kaba dangdon hapoh ka shlem ai jinghikai jong ka SAI Training Center bad ka dangdon ruh hapoh ka jingpynkhreh na ka bynta ka 39th National Games ka ban long ha u snem 2027 ha kane ka Jylla.
Nalor ka Melibad, ka Jylla ka la khur ka la khur ruh ïa kiwei pat ki takma rnong lyngba u Juh Pa U Juh Nongtdu ha ka jingïalympat ne ka Wrestling, kumjuh ka Verem Gedaliah Nongsiej ha ka jingïakop jngi ne ka Swimming bad ka Larityngkai Lawriniang ha ka jingïakop rah nar ne ka Weightlifting.
