Jerusalem, Iaiong:
Katkum ki khubor, la ong ba ka Israel bad ka Lebanon ki la mynjur ban iakren markhmat hapoh ka nongbah Washington jong ka United States, hadien ba kine ki arliang ki la don hapdeng ka jingiakynad kaba na ka por sha ka por naduh ki snem ba la leit.
“Ki nongiashim bynta ki la pynlong ia ki jingiakren kiba seisoh halor ki sienjam ban sdang ia ka jingiakren beit beit hapdeng ka Israel bad ka Lebanon,” la ong u nongaiktien ka tnad kam pohïing u Tommy Pigott ha ka kyrwoh.
“Baroh ki liang ki la mynjur ban sdang ïa ka jingïakren beit ha ka por bad ka jaka ba la mynjur lang,” u la ong. Kane ka jingpynbna ka long hadien ba ki nongmihkhmat jong ka Israel bad ka Lebanon ki la pynlong ïa ka jingïakren kaba la neh palat ar kynta ha kaba la pynïasuk da u symbud myntri bar ri jong ka US u Marco Rubio.
“Ka America ka la ai khublei ia ki ar tylli ki ri halor kane ka jingjia ba kongsan bad ka la pynpaw ia ka jingkyrshan jong ka ia ki jingiakren kiba kham bniah, bad ia ki jingthmu jong ka sorkar Lebanon ban pynphai biang ia ka jingsynshar marwei jong ka bor bad ban pynkut noh ia ka jingsynshar donbor jong ka Iran,” la ong u Pigott.
Bad ka la “pynskhem ba kano kano ka jingiateh ban pynsangeh ia ka jingialeh pyrshah ka dei ban long hapdeng ki ar tylli ki sorkar, kaba la pyniasuk da ka America, bad ym lyngba kano kano ka lynti kaba kyrpang,” u la bynrap.
Ka Lebanon ka la shah ring sha ka thma Iran kaba la jia ha ka thain baroh kawei ha ka 2 tarik u Lber hadien ba ka Hezbollah kaba kyrshan ia ka Iran ka la leit hiar thma ia ka Israel.
Naduh katei ka por, ki jinghiar thma jong ka Israel, ki la shim ia palat 2,000 ngut ki mynsiem briew bad ki la pynkynriah ia palat ia ka shi million ngut, wat hapdeng ka jingkhot jong ki ri ka pyrthei, ban sangeh iasiat, bad ki shipai khyndew jong ka Israel, ki la hiar thma ia ka thain shatei lam mihngi jong ka Lebanon.
